მოსამართლე კობა გოცირიძემ 50 ლარით დააჯარიმა მოქალაქე, რომელმაც ბათუმში პოლიციის შენობას მიახატა სტენსილი – „დაასრულე ბეტონყმობა“.
შენობაზე სტენსილის უნებართვოდ მიხატვისთვის პოლიციელებმა გიორგი ანანიძე 2021 წლის 16 დეკემბერს დააკავეს ადმინისტრაციული წესით. გიორგიმ სტენსილი რუსთაველის ქუჩაზე მდებარე ბარს დაახატა, რომელსაც საერთო კედელი აქვს პოლიციის შენობასთან.
კანონი ითვალისწინებს ჯარიმას ნებისმიერ შენობაზე უნებართვოდ შესრულებული მხატვრობისთვის, თუმცა უფლებადამცველების და ასევე ახალგაზრდა იურისტთა ასოციაციის შეფასებით, „ეს მუხლი ყოველ კონკრეტულ შემთხვევაში უნდა შეფასდეს გამოხატვის თავისუფლებასთან კონკურენციაში“.
ბათუმის საქალაქო სასამართლომ შენობაზე სტენსილის მიხატვა სამართალდარღვევად მიიჩნია.
„მე მხატვარი ვარ, ქუჩა იგივე გალერეაა და შეზღუდვების გარეშე უნდა ხატავდეს ნებისმიერი, ჰუმანური უნდა იყოს კანონი, პირველ რიგში. ეს საკმარისზე დიდი პრობლემაა,“ – გვითხრა გიორგი ანანიძემ.
მას სასამართლოს სხდომაზე ადვოკატი არ ჰყავდა. გიორგი ანანიძე ამბობს, რომ ის მეგობრების თხოვნით ასრულებდა სტენსილს, თუმცა თვითონაც აპროტესტებს ქაოსურ მშენებლობებს ბათუმში.
გიორგი ანანიძე სტენსილის ხატვის პროცესში დააკავეს. მნიშვნელოვანია კიდევ ერთი გარემოება – ის დაახლოებით 12 საათს გააჩერეს წინასწარი დაკავების იზოლატორში.
