ბათუმში, ვაჟა-ფშაველას #13-ში მიმდინარე უკანონო მშენებლობის შესახებ საქართველოს ახალგაზრდა იურისტთა ასოციაცია განცხადებას ავრცელებს, რომელსაც უცვლელად გთავაზობთ:
გვსურს გამოვეხმაუროთ ბათუმში ვაჟა-ფშაველას #13 მდებარე კულტურული მემკვიდრეობის ძეგლის ირგვლივ განვითარებულ მოვლენებს და აღვნიშნოთ შემდეგი:
- ოფიციალური ინფორმაციისთანახმად, 2015 წლის ივლისის თვეში, ბათუმში, ვაჟა-ფშაველას ქუჩა #13 მდებარე შენობას კულტურული მემკვიდრეობის ძეგლის სტატუსი მიენიჭა. შესაბამისად, სტატუსის მინიჭების დღიდან შენობაზე გავრცელდა კულტურული მემკვიდრეობის დაცვის ყველა სტანდარტი, რომელიც საქართველოს კანონმდებლობით არის გათვალისწინებული;
- „გაზეთი ბათუმელების“ინფორმაციის თანახმად, შენობისთვის ძეგლის სტატუსის მინიჭებიდან ხუთი თვის განმავლობაში – სახლს თანდათან მოხადეს სახურავი, მოანგრიეს შიდა კედლები, მოხსნეს მოაჯირი და 2015 წლის ოქტომბერში კულტურული მემკვიდრეობის ძეგლისგან მხოლოდ ფასადის კედელი დარჩა;
- 2015 წლის ნოემბერში, შენობის მესაკუთრე შპს „სლავა”-მ, ბათუმში ვაჟა-ფშაველას ქუჩა #13 მდებარე კულტურული მემკვიდრეობის ძეგლი უკანონოდ დაანგრია. თუმცა, კულტურული მემკვიდრეობის ძეგლის განადგურების ფაქტზე პროკურატურას ეფექტური საგამოძიებო მოქმედებები ამ დრომდე არ უწარმოებია და არ დამდგარა კონკრეტული პირების პასუხისმგებლობის საკითხი;
- მედიაში გავრცელებულიინფორმაციის მიხედვით, მიმდინარე წლის მარტის თვეში კომპანია „სლავა“-მ, ბათუმში ვაჟა-ფშაველას #13 მდებარე შენობის ადგილას სამშენებლო სამუშაოები უკანონოდ განაახლა, თუმცა შესაბამისი ადმინისტრაციული ორგანოების მხრიდან არ მომხდარა უკანონო საქმიანობის აღკვეთა.
ზემოთ აღნიშნულ საკითხებთან დაკავშირებით საიას მნიშვნელოვნად მიაჩნია, რომ:
- დაუყოვნებლივ უნდა შეჩერდეს შპს „სლავას“ მიერ, ბათუმში ვაჟა-ფშაველას #13 მდებარე შენობის ადგილას წარმოებული უკანონო სამშენებლო სამუშაოები;
- ყველა შესაბამისმა ადმინისტრაციულმა ორგანომ (აჭარის კულტურული მემკვიდრეობის დაცვის ეროვნული სააგენტო, ბათუმის მერიის ზედამხედველობის საქალაქო სამსახური, საქართველოს შინაგან საქმეთა სამინისტრო), დროულად უნდა უზრუნველყონ უკანონო სამუშაოების აღკვეთა;
- საქართველოს კულტურისა და ძეგლთა დაცვის სამინისტრომ, საქართველოს კულტურული მემკვიდრეობის დაცვის ეროვნულმა სააგენტომ და აჭარის კულტურული მემკვიდრეობის დაცვის ეროვნულმა სააგენტომ – შპს „სლავა“-ს მიერ, კულტურული მემკვიდრეობის განადგურების ფაქტზე, უზრუნველყონ კომპანიის მხრიდან ზიანის ანაზღაურება;
- საქართველოს პროკურატურამ დროულად და ეფექტურად აწარმოოს გამოძიება კულტურული მემკვიდრეობის ძეგლის განადგურების ფაქტზე და მოხდეს შესაბამისი პირების სისხლის სამართლებრივ პასუხისგებაში მიცემა.