ნეტგაზეთი • RU

რუსეთში თევზის ფერმიდან 300 ტონამდე ამერიკული კალმახი გაიპარა

რუსეთის ფედერაციაში, ქალაქ სოჭთან ახლოს, 300 ტონამდე ამერიკული კალმახი გაიპარა. მედიის ცნობით, ადგილობრივი მეთევზეები სამი დღეა კალმახს იჭერენ.

თევზის ფერმა ზღვაში შტორმმა დააზიანა, რის შემდეგაც გაპარული კალმახი სოჭის პორტთან მოგროვდა. ადგილობრივი მეთევზეები მედიასთან ამბობენ, რომ ამ რაოდენობის თევზი ფერმიდან სოჭში ბოლო 15 წელია აღარ გაპარულა.

ამერიკული კალმახი დელიკატესად მიიჩნევა, ამ ჯიშის 1 კილოგრამი თევზი რუსეთში 1,9 ათასი რუბლი ღირს. ზუსტად უცნობია რა ზომის იყო ფერმა, საიდანაც კალმახი გაიპარა და არც ზარალის ზუსტი ოდენობაა დათვლილი.

უცნობია, ზუსტად რომელ დღეს დაზიანდა ფერმა. მეთევზეები ადასტურებენ მხოლოდ იმას, რომ ბოლო სამი დღეა, ყოველდღიურად, 2-დან 17 კილოგრამამდე ამერიკულ კალმახს იჭერენ.

რუსული მედიის ცნობით, ჯერჯერობით უცნობია ზუსტად რომელი ფერმა დაზიანდა სოჭში. მათივე ცნობით, აკვაკულტურით დაკავებული ასეთი კერძო ფერმა სოჭში არაერთია.


მთავარი ფოტო: აგროკავკასია/ამერიკული კალმახი

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com