Batumelebi | გიორგი კირთაძე: ასეთი ცვლილება თვითმმართველობის იდეასთან წინააღმდეგობაშია გიორგი კირთაძე: ასეთი ცვლილება თვითმმართველობის იდეასთან წინააღმდეგობაშია – Batumelebi
RU | GE  

გიორგი კირთაძე: ასეთი ცვლილება თვითმმართველობის იდეასთან წინააღმდეგობაშია

დღეს, 10 მარტს  ბათუმის საკრებულოს “ერთიანი ნაციონალური მოძრაობის” ფრაქციის თავმჯდმოარემ გიორგი კირთაძემ განცხადება გააკეთა.

მისი თქმით დღეს ჩანიშნული საკრებულოს სხდომა ჩაიშალა: „რადგან საკრებულოს თავმჯდომარემ [ჭეიშვილმა] ვერ მოუყარა თავი 13 დეპუტატს ვინც მხარს დაუჭერდა ბიუჯეტში ცვლილებას“, –  ცვლილებები ბათუმის 2016 წლის ბიუჯეტში, ფეხბურთის განვითარების მხარდაჭერისთვის განკუთვნილი თანხის ა(ა)იპ − ქართული ფეხბურთის განვითარების ფონდში გადარიცხვას შეეხებოდა.

გიორგი კირთაძის თქმით, პრემიერ-მინისტრის დადგენილება წარმოადგენდა თხოვნას / რეკომენდაციას, რომელიც ბათუმის მერმა გიორგი ერმაკოვმა პირდაპირ ბრძანებად მიიღო და ბიუჯეტში ცვლილების კანონპროექტი წარადგინა.

„მინდა მოვუწოდო უმრავლესობის  დეპუტატებს, რომ მომავალ სხდომაზე, როდესაც ჩატარდება ის, მხარი არ დაუჭირონ ამ ცვლილებას“, – განაცხადა გიორგი კირთაძემ და აღნიშნა, რომ ამ ცვლილებით ზარალდება ბათუმის დინამო, რომელიც ცვლილების შემდეგ მიიღებს განახევრებულ დაფინანსებას და გარდა ამისა აღნიშნული ცვლილება თვითმმართველობის იდეასთან სრულ წინააღმდეგობაშია.

„ჩვენ ბათუმის დინამოსთვის გამოვყევით ფული და დავაკელით ჭაობის რეაბილიტაციას, ახლა კი გამოდის, რომ ჩვენ ამ ფულით ვაფინანსებთ არა ბათუმის დინამოს, არამედ სამტრედიის ჩიხურას, ბატონი სპორტის მინისტრის პირად კლუბს – საბურთალოს, თბილისის დინამოს და ა.შ.“, – თქვა გიორგი კირთაძემ და დასძინა, რომ თვითმმართველობის იდეის მიხედვით თვითმმართველმა ერთეულმა უნდა განკარგოს საკუთარი ბიუჯეტი. 

საკრებულოს სხდომა 16 მარტისთვისაა დანიშნული, დღის წესრიგს კი ბიუჯეტში ცვლილების გარდა სხვა საკითხებიც დაემატა.

ნეტგაზეთის მასალების სხვა გამოცემებში გადაბეჭდვის წესი
ავტორი
ირმა დიმიტრაძე არის გაზეთ "ბათუმელების" რეპორტიორი 2016 წლიდან