ქედის მუნიციპალიტეტის 29 საჯარო სკოლაში მზის მიკრო ელექტროსადგურების პანალები უნდა დაამონტაჟონ. მომსახურების შესყიდვაზე აჭარის განათლების სამინისტრომ ტენდერი უკვე გამოაცხადა. სატენდერო თანხა 349 645 ლარია.
პანელების მონტაჟი ტენდერში გამარჯვებულთან ხელშეკრულების გაფორმებიდან 4 თვეში უნდა დასრულდეს.
ტენდერის პირობის მიხედვით, „ამ ვადის ცვლილების [გაზრდის] საფუძველს არ წარმოადგენს თოვლი, წვიმა და სხვა მსგავსი მეტეოროლოგიური მოვლენები [მოწოდების ვადა განისაზღვრა მსგავსი გარემოებების გათვალისწინებით], ასევე ობიექტის მიმდებარედ მიმდინარე სხვა სამუშაოები“.
წინადადებების მიღება იწყება 2022 წლის 25 იანვარს და სამ დღეში, 28 იანვარს დასრულდება.
სამინისტროს ინფორმაციით:
- ქედის მუნიციპალიტეტის საჯარო სკოლებში მზის მიკრო ელექტროსადგურების მოწყობისთვის საჭირო საპროექტო დოკუმენტაცია შედგენილია შპს „ვეგა+“-ის მიერ აჭარის არ განათლების, კულტურისა და სპორტის სამინისტროსტან 2021 წლის 30 აგვისტოს გაფორმებული სახელმწიფო შესყიდვის შესახებ ხელშეკრულების საფუძველზე.
- კომპანიამ ჩაატარა სათანადო საკვლევაძიებო ტოპო-გეოდეზიური, საინჟინრო-გეოლოგიური, ვიზუალური დათვალიერებისა და აზომვითი სამუშაოები, მოქმედი ნორმატიული დოკუმენტების შესაბამისად.
„პროექტის მიზანია მზის ენერგიის გამოყენება საჯარო სკოლებში, ასევე განახლებადი ენერგიების გამოყენების პროპაგანდა და ხელშეწყობა“, – აცხადებს სამინისტრო.
დოკუმენტების მიხედვით: „მზის მიკროელექტროსადგური წარმოდგენილია ცალკე მდგომი, მონოლითური რკინაბეტონის საძირკველზე დაანკერებულ ფოლადის მილზე დამონტაჟებული მზის მოდულით. მოდულის დახრა 34⁰, მიმართულება სამხრეთი. ტერიტორია შემოღობილია, მოწყობილია დამიწების კონტური. გათვალისწინებულია გარემოს დაცვისა და უსაფრთხოების ტექნიკის უზრუნველყოფის პირობები“.
შესრულებულ სამუშაოებზე გარანტიის მოქმედების ვადად 2023 წლის 31 იანვრის ჩათვლით პერიოდია განსაზღვრული.
