ხულოში გზები ჩაკეტილია, გაითიშა შუქი – თოვლის საფარის სიმაღლე ნახევარ მეტრზე მეტია

დღეს, 22 დეკემბერს, ხულოში გზები ჩაკეტილია, დაბა და ხულოს სოფლები შუქის გარეშეა დარჩენილი.

ხულოს მერის, ვახტანგ ბერიძის თქმით, დაწყებულია გზის გაწმენდის სამუშაოები, თუმცა ამ დროისთვის რამდენიმე მიმართულებით მსუბუქი ავტომანქანების გადაადგილება შეზღუდულია.

„ამ დროისთვის თითქმის ყველგან არის შეფერხება, მაგრამ მალე აღდგება… გზების გაწმენდა დამოკიდებულია თოვაზე, ამ დრომდე ინტენსიურად თოვს. ამ მონაცემებით 2 – 3 საათში უნდა გაიწმინდოს გზა,“ – ამბობს ხულოს მერი, ვახტანგ ბერიძე.

ხულოს მერის ინფორმაციით, დღეს დილით ხულოს ცენტრში თოვლის საფარის სიმაღლე დაახლოებით ნახევარი მეტრია, მაღალმთიან სოფლებში კი – 70-80 სანტიმეტრი.

ხულოს ცენტრსა და სოფლებში არ აქვთ ელექტროენერგიაც. ხულოს მერის ინფორმაციით, ამ მიმართულებითაც დაწყებულია მუშაობა.

„11 საათზე გვაქვს შტაბის სხდომა ხულოს მერიაში და მივიღებთ შესაბამის გადაწყვეტილებებს,“ – გვითხრა ვახტანგ ბერიძემ.

________________

ფოტო „ბათუმელების“ არქივიდან