დღეს ბათუმში, აჭარის მთავრობის სახლთან ოპოზიციის აქცია მიმდინარეობს სლოგანით – „გამოფხიზლდი პოლიცია“. ,,ნაციონალურ მოძრაობაში” აცხადებენ, რომ ხელისუფლების მხრიდან მოსყიდვასა და შანტაჟის ფაქტებმა იმსხვერპლა ბათუმის საკრებულოს წევრი, ნუგზარ ფუტკარაძე, შს სამინისტრო და პროკურატურა კი ამ ფაქტზე გამოძიებას არ იწყებენ.
ბათუმის ახალი საკრებულოს წევრი ნუგზარ ფუტკარაძე 18 ნოემბერს გარდაიცვალა. ენმ-ს თქმით, ნუგზარ ფუტკარაძეს სთავაზობდნენ 100 ათას დოლარს იმის სანაცვლოდ, რომ ყოფილიყო „ნეიტრალი“, ანუ დაეტოვებინა ,,ნაციონალური მოძრაობა” და დამოუკიდებელი დეპუტატის სტატუსით გაეგრძელებინა საქმიანობა საკრებულოში.
24 ნოემბერს „ნაციონალურმა მოძრაობამ“ გამოაქვეყნა 45-წუთიანი აუდიოფაილი, რაც ენმ-ს ლიდერების მტკიცებით, ბათუმის საკრებულოში ენმ-ს წევრის, ნუგზარ ფუტკარაძის მოსყიდვის მცდელობას ასახავს. ჩანაწერი გაკეთებულია ნუგზარ ფუტკარაძის მიერ.
„ნუგზარ ფუტკარაძე მოკლეს მამა-შვილმა რიჟვაძეებმა, ბიძინას, ღარიბაშვილის და კობახიძის დავალებით“, – აცხადებს ელგუჯა ბაგრატიონი, უმაღლესი საბჭოს წევრი ენმ-დან.
ამ საკითხზე გუშინ მოკლე კომენტარი გააკეთა თორნიკე რიჟვაძემაც. მან თქვა, რომ „ყველას მოვთხოვ ბოდიშის მოხდას“
აქციაზე იმყოფება გარდაცვლილი ნუგზარ ფუტკარაძის და, ნაზი ფუტკარაძე. აჭარის საპატრულო პოლიციის უფროსმა, დავით მაღრაძემ მას აცნობა, რომ თორნიკე რიჟვაძე თანახმაა მას შეხვდეს. ნაზი ფუტკარაძის თქმით, აჭარის მთავრობის თავმჯდომარეს მხოლოდ იმ შემთხვევაში შეხვდება, თუ მასთან ერთად იქნება ელგუჯა ბაგრატიონი ან ჟურნალისტები.
ნაზი ფუტკარაძეს ამაზე უარი უთხრეს.
ნუგზარ ფუტკარაძეს გარდაცვალებამდე ოპოზიციას ბათუმის საკრებულოში უმრავლესობა ჰქონდა – ამჯერად მანდატები 35-წევრიან საკრებულოში ასე ნაწილდება: „ქართული ოცნება“ – 16 წევრი, ენმ – 14 წევრი, „გახარია საქართველოსთვის“ – 2 წევრი, ლელო – 1 წევრი, დამოუკიდებელი კანდიდატი – 1 წევრი. ეს უკანასკნელი გახარიას გუნდს წარმოადგენდა, მაგრამ არჩევნების შემდეგ მან პარტია დატოვა.
