Batumelebi | მურმან დუმბაძე საგარეჯოს იზოლატორშია – როდის გაასამართლებენ აქციაზე სხვა დაკავებულებს მურმან დუმბაძე საგარეჯოს იზოლატორშია – როდის გაასამართლებენ აქციაზე სხვა დაკავებულებს – Batumelebi
RU | GE  

მურმან დუმბაძე საგარეჯოს იზოლატორშია – როდის გაასამართლებენ აქციაზე სხვა დაკავებულებს

თბილისში, საპროტესტო აქციაზე, გუშინ ადმინისტრაციული წესით დაკავებული მურმან დუმბაძე საგარეჯოს წინასწარი დაკავების იზოლატორშია. მისი და აქციაზე დაკავებული კიდევ რამდენიმე ოპოზიციონერის ადგილსამყოფელის შესახებ ინფორმაცია ოპოზიციისთვის დღეს გახდა ცნობილი.

დაკავებულები სხვადასხვა ქალაქში გადაიყვანეს, მაგალითად, ელგუჯა ბაგრატიონი მარნეული წინასწარი დაკავების იზოლატორში მოათავსეს, ბონდო თედორაძე – ხაშურში.

გუშინ, 10 ნოემბერს, სუსის მოწყობილ საპროტესტო აქციაზე 46 ოპოზიციონერი ერთდროულად დააკავეს, მათ შორის, 11 ადამიანი აჭარიდანაა. ადმინისტრაციული წესით დაკავებულებს შორის არიან: აჭარის უმაღლესი საბჭოს დეპუტატი, ფრაქცია „ერთიანი ნაციონალური მოძრაობის“ თავმჯდომარე ელგუჯა ბაგრატიონი, ქობულეთის მერობის კანდიდატი ოპოზიციური ერთობიდან ბონდო თედორაძე, ქობულეთის საკრებულოს ახალი მოწვევის წევრი ენმ-დან ლაშა კომახიძე, ასევე ბათუმის საკრებულოს ახალი მოწვევის წევრები ენმ-დან: მამუკა ქობულაძე, ალექსანდრე ვარშალომიძე და ბაჩი მექვაბიშვილი.

ამ დრომდე დაკავებულების სასამართლო განხილვა არ დაწყებულა.

„48 საათის ვადას იყენებენ, რადგან მიზანი მართლმსაჯულება კი არ არის, არამედ ის, რომ ისინი ჰყავდეთ იზოლატორებში გამომწყვდეული,“ – ამბობს მირდატ ქამადაძე, ბათუმის საკრებულოს წევრი ენმ-დან. მისი ვარაუდით, 48 საათის გასვლის შემდეგ დაკავებულებს გაათავისუფლებენ და შემდეგ ჩატარდება სასამართლო სხდომები.

აქციაზე დაკავებულებს წვრილმან ხულიგნობას და პოლიციელების კანონიერი მოთხოვნების დაუმორჩილებლობას ედავებიან.

ოპოზიცია საპროტესტო აქციას დღესაც მართავს. აქციის მოთხოვნა უცვლელია: მიხეილ სააკაშვილის მრავალპროფილურ კლინიკაში გადაყვანა.

ნეტგაზეთის მასალების სხვა გამოცემებში გადაბეჭდვის წესი
ავტორი