პოლონეთის ყოველდღიურად მილიონი ევროთი დაჯარიმების გადაწყვეტილება ევროკავშირის სასამართლომ მიიღო.
პოლონეთმა არ შეასრულა დამოუკიდებელ სასამართლო სისტემასთან დაკავშირებული ევროკავშირის მოთხოვნა.
ევროსასამართლომ მოუწოდა პოლონეთს შეეჩერებინა დისციპლინარული პალატის მუშაობა, რომელიც 2018 წელს შეიქმნა პოლონეთში სასამართლო რეფორმის ფარგლებში და ინიცირებულია მმართველი პარტიის მიერ.
პალატის მოვალეობაა განიხილოს საჩივრები უზენაესი და სააპელაციო სასამართლოების მოსამართლეების, პროკურორების, ადვოკატებისა და ნოტარიუსების გადაცდომების შესახებ.
სადისციპლინო პალატის წევრები ეროვნული საბჭოს გადაწყვეტილებით დაინიშნნენ და პოლონეთის ოპოზიციის მტკიცებით, საბჭოს შემადგენლობას მთლიანად მმართველი პარტია აკონტროლებს. პალატის კრიტიკოსების თქმით, მმართველ პარტიას პალატის საშუალებით შეუძლია ქვეყნის ყველა მოსამართლის კონტროლი და მათგან არასასურველი კადრების გათავისუფლებაც.
2020 წლის აპრილში ევროსასამართლომ პოლონეთს დაავალა შეეჩერებინა სადისციპლინო პალატის მუშაობა საბოლოო განაჩენის გამოტანამდე.
სადისციპლინო პალატამ საქმიანობა მხოლოდ ერთი წლით შეაჩერა, თუმცა ევროსასამართლოს გადაწყვეტილების გასასაჩივრებლად პოლონეთის საკონსტიტუციო სასამართლოს მიმართეს. პოლონეთის მთავრობა ევროკავშირს სადისციპლინო პალატის შესახებ კანონის შეცვლას დაჰპირდა რეფორმის ფარგლებში, მაგრამ ჯერჯერობით ოფიციალურად არაფერი გაუკეთებია.
დისციპლინური კომისიის მუშაობის შეჩერებაზე უარის თქმისთვის სექტემბერში ევროკომისიამ ევროსასამართლოს მიმართა პოლონეთის ყოველდღიურად მილიონი ევროთი დასაჯარიმებლად.
ეს უკვე მესამე ყოველდღიური ჯარიმაა, რაც პოლონეთს ევროკავშირისგან დაეკისრა. პირველი ორი ჯარიმა 100 და 500 ათას ევროს შეადგენს, ამ შემთხვევაშიც პოლონეთის ხელისუფლებამ არ შეასრულა ევროსასამართლოს გადაწყვეტილება, რომელიც ბელოვეჟსკის ნაკრძალში ტყეების გახშირებულ ჩეხვას და ჩეხეთის საზღვარზე შახტების დახურვას შეეხებოდა.
როგორც BBC-ი წერს, პოლონეთი კიდევ ერთი დიდი ფინანსური დანაკარგის საშიშროების წინაშე დგას: ევროკომისიამ ფაქტობრივად გაყინა საზოგადოებრივი ფონდიდან პოლონეთისთვის გადარიცხული ათობით მილიარდი ევრო, რაც პანდემიის შედეგებთან საბრძოლველად იყო გამოყოფილი.
______________________________________________
წყარო: BBC
