Batumelebi | დაიცავით უსაფრთხოების ნორმები, ტერიტორია შემოსაზღვრულია – შსს მოქალაქეებს მიმართავს დაიცავით უსაფრთხოების ნორმები, ტერიტორია შემოსაზღვრულია – შსს მოქალაქეებს მიმართავს – Batumelebi
ნეტგაზეთი • RU

დაიცავით უსაფრთხოების ნორმები, ტერიტორია შემოსაზღვრულია – შსს მოქალაქეებს მიმართავს

დღეს, 8 ოქტომბერს, ბათუმში, 26 მაისის ქუჩაზე, კორპუსის სადარბაზო ჩამოინგრა. შემთხვევა დაახლოებით 12 საათზე მოხდა. უსაფრთხოების ზომების დაცვის მიზნით შემოსაზღვრულია ტერიტორია. შინაგან საქმეთა სამინისტრო სპეციალური განცხადებით მოუწოდებს მოქალაქეებს, ასევე, ადგილზე მყოფ ყველა მედიასაშუალების წარმომადგენელს, დაემორჩილონ შინაგან საქმეთა სამინისტროს თანამშრომლების მითითებებს და დაიცვან უსაფრთხოების ნორმები.

შსს-ს ამავე განცხადებაში ნათქვამია, რომ მობილიზებული არიან შინაგან საქმეთა სამინისტროს განსაკუთრებულ დავალებათა დეპარტამენტის და საექსპერტო-კრიმინალისტიკური დეპარტამენტის თანამშრომლები. მიმდინარეობს აჭარის მეზობელი რეგიონებიდან დამატებითი ცოცხალი ძალის მობილიზება.

შსს-ს ინფორმაციით ადგილზე მისვლისთანავე, მეხანძრე-მაშველებმა ჩამონგრეული სადარბაზოს მეზობელი ბინებიდან, ასევე, ნანგრევებში მოყოლილი ავტომობილებიდან მოსახლეობის ევაკუაცია განახორციელეს.
ადგილზე მობილიზებულია სამაშველო სამსახური. მოსახლეობა მაშველებს ეხმარება ჩამონგრეული ადგილის გაწმენდაში.

სასწრაფო დახმარების სამსახურმა რამდენიმე ადამიანი გადაიყვანა კლინიკაში. ჯერჯერობით არ ვრცელდება ინფორმაცია მსხვერპლის შესახებ.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com