დღეს, 4 ოქტომბერს, საჯარო და კერძო სკოლებში სასწავლო პროცესი სკოლის შენობებში განახლდა. 15 სექტემბრიდან მოსწავლეები, პირველკლასელების გარდა, კორონავირუსის გამო ონლაინ სწავლობდნენ.
საკოორდინაციო საბჭოს გადაწყვეტილებით, სკოლებსა და უნივერსიტეტებს დღეიდან, 4 ოქტომბრიდან, მიეცათ უფლება სწავლა შენობებში განაახლონ. თუმცა მოსწავლეებს/მშობლებს უფლება აქვთ, სწავლის ფორმატი ამჯერადაც აირჩიონ – წავიდნენ სკოლაში ან გააგრძელონ სწავლა ონლან.
აჭარის განათლების სამინისტროს ინფორმაციით, დღეს, 4 ოქტომბერს, ბათუმის სკოლებში მოსწავლეების 81 პროცენტი გამოცხადდა.
- შუახევში – 95 პროცენტი
- ქედაში – 95 პროცენტი
- ქობულეთში – 95 პროცენტი
- ხულოში – 96 პროცენტი
- ხელვაჩაურში – 89 პროცენტი
რაც შეეხება უნივერსიტეტებს, მათი ნაწილი სწავლას სხვადასხვა რიცხვში და ჰიბრიდული მეთოდით განაახლებს. მაგალითად, ბათუმის სახელმწიფო უნივერსიტეტი 11 ოქტომბერს აპირებს სწავლის განახლებას, თსუ-მ დღეს დაიწყო შერეული მეთოდით სწავლა, ხოლო ილიას სახელმწიფო უნივერსიტეტი სავარაუდოდ 18 ოქტომბერს განაახლებს სასწავლო პროცესს.