ბათუმში, რუსთაველზე, 2 კორპუსს ააშენებენ კერძო სახლების ნგრევის ხარჯზე 

ბათუმში, რუსთაველის #21-ში არსებული სახლების ნგრევის ხარჯზე შპს „გრინკო“ კორპუსის მშენებლობას გეგმავს. პროექტი აჭარის კულტურული მემკვიდრეობის ზონალურმა საბჭომ 2019 წელს განიხილა და შეითანხმა. საბჭოს სხდომაზე დაფიქსირებული ინფორმაციით, პროექტის სიმაღლე 40 მეტრია.

კომპანიამ რუსთაველის #21-ში, 978 კვ.მ-ზე განაშენიანების დეტალური გეგმის დამუშავების თაობაზე მერიას მიმართა. დაწყებულია ადმინისტრაციული წარმოება.

რუსთაველის #21-ში სამშენებლოდ მოაზრებულ ტერიტორიაზე ორი ორსართულიანი სახლია გზის პირას, ხოლო მათ უკან ბარაკული ტიპის ერთსართულიანი სახლებია.

ბათუმი რუსთაველის #21

რუსთაველის #21

ბათუმი, რუსთაველის #21

მერიაში განმარტავენ, რომ „კომპანიის მიზანი ბარაკული ტიპის ამორტიზებული საცხოვრებელი სახლების სანაცვლოდ მრავალსართულიანი შენობის მშენებლობა, მცხოვრებეთა სოციალური პირობების გაუმჯობესება და ქალაქის ცენტრალურ ნაწილში – ზღვისპირა პარკის მიმდებარედ უსახური ობიექტების თანამედროვე არქიტექტურული ღირებულების მქონე შენობით ჩანაცვლებაა.“

აქვს თუ არა კომპანიას ექსპერტიზის დასკვნა, რომელიც ადასტურებს, რომ სახლები ნამდვილად ამორტიზებულია, ამის შესახებ ინფორმაცია არ გვაქვს.

რუსთაველის #20-ში არსებული შენობის ათვისების ხარჯზე სასტუმროს მშენებლობას გეგმავს ასევე შპს „ორიქსი“. კომპანიამ მერიას ნაკვეთის განაშენიანების დეტალური გეგმის მომზადების თაობაზე მიმართა და დაწყებულია შესაბამისი ადმინისტრაციული წარმოება.

კომპანია რუსთაველის #20-ში 1041 კვ.მეტრ მიწის ნაკვეთს ფლობს. სამშენებლოდ მოაზრებული ტერიტორია სასტუმრო „ინტურისტს“ ესაზღვრება, რომელიც კულტურული მემკვიდრეობის ძეგლია. პროექტი ითვალისწინებს ასევე ამ სახლის უკან გამწვანებული ეზოსა და ერთსართულიანი შენობების ათვისებას [სადაც ადრე რესტორანი „ტალღა“ იყო].

მერიის განმარტებით: ინიციატორის მიერ დასახელებული განვითარების მიზანია 8-სართულიანი სასტუმროს მშენებლობაა, რაც უზრუნველყოფს საპროექტო კომპლექსის ვიზუალურ, მოცულობით, არქიტექტურულ და ქალაქგეგმარებითი მნიშვნელობიდან გამომდინარე მოცემული ადგილის განვითარებას, რისთვისაც საჭიროა განაშენიანების ინტენსივობის კ2 კოეფიციენტის გადამეტება. დაინტერესებული პირი განმარტავს, რომ პროექტირების განხორციელების მთავარი მიზანი არის აღნიშნული კვარტალის არქიტექტურული იერ-სახის სრულყოფა და არსებული ამორტიზებული შენობის ნაცვლად ახალი ესთეტიკური ვიზუალის მქონე სასტუმროს მშენებლობა.

ბათუმი, რუსთაველის #20

შპს ORIX – ის ასივე პროცენტის მფლობელი ბათუმში სასტუმრო „ჰილტონის“ მფლობელი კომპანია შპს „ანურიაა“. შპს „ანურიას“ რუსეთის მოქალაქე კლიმენტი ქასრაძე ფლობს, მას ორმაგი მოქალაქეობა აქვს.