ნეტგაზეთი • RU

„გამორიცხულია, „ქართული ოცნება“ არ დაუბრუნდება ამ შეთანხმებას“ – ღარიბაშვილი მიშელის შეთანხმებაზე

საქართველოს პრემიერ-მინისტრმა, ირაკლი ღარიბაშვილმა დღეს ჟურნალისტებთან კომენტარი გააკეთა „ნაციონალური მოძრაობის“ მხრიდან შარლ მიშელის დოკუმენტის ხელმოწერაზე. მისი თქმით, ამ დოკუმენტზე ხელის მოწერა „არის ფარსი და სიყალბე“.

„მათ ხელმოწერას ფასი ექნებოდა მაშინ, როცა ჩვენ ყველამ ერთად, ჩვენი დიდი მეგობრის შარლ მიშელის, ამერიკის ელჩის უშუალო მედიაციით დავასრულეთ ამ დოკუმენტზე მუშაობა და მაშინ ყველამ ერთად მოვაწერეთ ხელი, ყველა იმ ფაქტორის გათვალისწინებით, რაც იმ კონკრეტულ მომენტში არსებობდა.

შეურაცხყოფა მიაყენეს მათ მთელ საერთაშორისო საზოგადოებას, ჩვენს პარტნიორებს და წარმოიდგინეთ, მათთვის და იმისთვის, რომ რეალურად ჩვენი სახელმწიფოსთვის გადავდგით ასეთი კომპრომისული ნაბიჯები, გავაკეთეთ ყველაფერი იმისთვის, რომ დამშვიდებულიყო სიტუაცია და იმისთვის, რომ რაღაც პოლიტიკური შეთანხმება მომხდარიყო. ამაზე ნაწილობრივ წამოვიდნენ, გახსოვთ ალბათ, რომ ბოლო მომენტამდე არ შემოდიოდნენ პარლამენტში და ბაზარში რომ არის ვაჭრობა, ასეთი ვაჭრობა გამართეს ჩვენ ამერიკელ და ევროპელ მეგობრებთან.

ამის მიუხედავად, ჩვენ ხელი მოვაწერეთ ამ შეთანხმებას, ველოდეთ ასი დღე, მიუხედავად მოწოდებებისა და ევროპელი და ამერიკელი მეგობრების მხრიდან, მათ იგნორირება მოახდინეს ჩვენი პარტნიორების და არ მოაწერეს ხელი. ეს არ არის საბავშვო ბაღი, ეს პოლიტიკაა და ეს არის პირველ რიგში სახელმწიფოს ინტერესები. ამიტომაც ანულირება მოვახდინეთ და გამოვედით ამ ხელშეკრულებიდან. ახლა გამორიცხულია, „ქართული ოცნება“ არ დაუბრუნდება ამ შეთანხმებას“, – ამბობს ირაკლი ღარიბაშვილი.

___

„ნაციონალურმა მოძრაობამ“, სხვა ოპოზიციური პარტიებისგან განსახვევით, შარლ მიშელის 19 აპრილის დოკუმენტს ხელი დღეს, 2 სექტემბერს, მოაწერა.

ნაც. მოძრაობამ შარლ მიშელის დოკუმენტს ხელი მოაწერა

შარლ მიშელის დოკუმენტი მოიცავს საარჩევნო და მართლმსაჯულების რეფორმების ჩატარების ვალდებულებას და პარლამენტში ძალაუფლების განაწილებას. ამასთან, შეთანხმების თანახმად, ვადამდელი საპარლამენტო არჩევნები დაინიშნება 2022 წელს იმ შემთხვევაში, თუ 2021 წლის ოქტომბრის ადგილობრივი თვითმმართველობის არჩევნებში პარტია “ქართული ოცნება” მიიღებს ნამდვილი პროპორციული ხმების 43% -ზე ნაკლებს.

თუმცა „ქართულმა ოცნებამ“ 28 ივლის განაცხადა, რომ შარლ მიშელის შეთანხმებიდან გადის.

“ოცნება” შარლ მიშელის შეთანხმებიდან გადის

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com