სოფელ შარაბიძეებში მოსახლეობამ გზა გადაკეტა და საპროტესტო აქციას მართავს. აქციაზე ძირითადად ქალები და ბავშვები არიან გამოსულები, რომლებმაც გზის გადასაკეტად ველოსიპედები, ქვები და საბავშვო ეტლი გამოიყენეს.
შარაბიძეებში მცხოვრებლები მათ დასახლებაში ცხოვრებისთვის შექმნილ გაუსაძლის პირობებს აპროტესტებენ. ამბობენ, რომ აწუხებთ მტვერი და ხმაური, რომელსაც ცემენტის ქარხნები იწვევს.
„მთელი ღამის განმავლობაში ისმის ხმაური. საშინელებაა. შეუძლებელია აქ გაჩერება. ვითხოვთ ფილტრები დააყენონ. ხმაური და ვიბრაცია გააკონტროლონ. არც გზა არ გვაქვს, შეუძლებელია აქ გავლა,“ – ამბობენ ადგილობრივები.
მოქალაქეები ამბობენ, რომ მერიას წერილობით მიმართეს, თუმცა ადგილობრივი თვითმმართველობიდან მათი პრობლემით არავინ დაინტერესებულა.
