დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ, დღეს, 31 აგვისტოს, გამართული საკოორდინაციო საბჭოს სხდომის შემდეგ ისაუბრა აცრებზე, მოზარდებში კორონავირუსის გავრცელებასა და სიკვდილიანობის შემცირებაზე.
„14 წლამდე ბავშვების ინფიცირება გვაქვს 15 პროცენტი, თუ 19 წლამდე ჩავთვლით, ეს არის 20 პროცენტი“, – განაცხადა ამირან გამყრელიძემ.
რაც შეეხება სიკვდილიანობის მაჩვენებელს, ამირან გამყრელიძის განმარტებით, სიკვდილიანობა შემცირდება მხოლოდ იმ შემთხვევაში, თუ ინფიცირება შემცირდება:
„თუ ჩვენ მომდევნო 2 კვირაში დავიცავთ ყველა იმ წესს – პირბადე, ვაქცინაცია, შეზღუდვების და რეგულაციების დაცვა, რაც მოწოდებულია, თანდათან სიკვდილიანობის მაჩვენებელი… იცით, რომ სიკვდილიანობის მაჩვენებელი პროპორციულ დამოკიდებულებაშია შემთხვევათა რაოდენობასთან. ყოველ 1000 შემთხვევაზე, სამწუხაროდ, არის 10, 15, 20-მდეც გარდაცვალება. აქედან გამომდინარე, როგორც კი შევამცირებთ ჩვენ ახალ შემთხვევათა რაოდენობას, თანდათან, ერთი კვირის შემდეგ, ამას მოჰყვება სიკვდილიანობის მაჩვენებლის შემცირებაც“.
ამირან გამყრელიძის თქმით, დეკემბრისთვის ერთი ან ორი ასეულის ფარგლებში ჩამოვა ინფიცირება, ოღონდ მხოლოდ იმ შემთხვევაში, თუ ვაქცინაცია გაგრძელდება, მაღალი მაჩვენებელი იქნება პირბადის ტარების და ასევე დაცული იქნება ყველა ის წესი, რასაც დაავადებათა კონტროლი მოუწოდებს მოსახლეობას.
ამირან გამყრელიძის ინფორმაციით, 31 აგვისტოს მდგომარეობით, ქვეყანაში გამოყენებულია 1,2 მილიონი დოზა ვაქცინა, 800 000 ადამიანი აცრილია ერთი დოზით. ხოლო 400 000 ადამიანი – სრულად.
___
ბოლო 24 საათში საქართველოში კორონავირუსით 79 ადამიანი გარდაიცვალა.
