„ეიცარი რამითჯერ გითხრა?!“, „ეიცერი ღმერთი ხათრიზა“, „ერიდე ანტივაქსერს, აღრიბასანს და საფრი ხიდს“, – ხულოში ახალგაზრდების ჯგუფმა ამ სლოგანებით კორონავირუსის აცრის მხარდამჭერი კამპანია დაიწყო ონლაინში.
კამპანია იუმორისტულ ხასიათსაც ატარებს.
აქციას დიდი გამოხმაურება მოჰყვა სოციალურ ქსელებში, ამიტომ კამპანიის წარმომადგენლებმა აუდიტორიას განუმარტეს, მაგალითად, რას ნიშნავს „აღრიბასანი“.
„აღრიბასანი არის ავი სული (ბავშვობაში გვაშინებდნენ აღრიბასანით 
). საფრის ხიდი არის ავარიული ხიდი ხულო-ახალციხის გზაზე, რომელსაც სულ პრობლემები აქვს (როგორც თავად გზას), – წერენ ავტორები.
კამპანიის ორგანიზატორი, სტუდენტი ივერი შაინიძე „ბათუმელებთან“ ამბობს, რომ მოსახლეობაში არ არის საკმარისი ინფორმაცია აცრის სიკეთეებთან დაკავშირებით და უფრო მითების სჯერათ:
„ამიტომ გადავწყვიტეთ ამ ფორმით შეგვეტანა ჩვენი წვლილი, რომ დავარწმუნოთ მოსახლეობა პანდემიის დამარცხების ერთადერთი გზა ვაქცინაა. რახან ძირითადად ხულოში ვგეგმავთ კამპანიას, ჩავთვალეთ, რომ პლაკატებზე წარწერები, ფრაზები ადგილობრივი, ამ კუთხისთვის დამახასიათებელი დიალექტი შეგვეჩია, რამაც გაამართლა. დიდი გამოხმაურება მოყვა სოციალურ ქსელში“.
ივერი შაინიძის თქმით, ისინი ამავე კამპანიის ფარგლებში სხვადასხვა აქტივობას გეგმავენ: „ვაპირებთ როგორც კარდაკარის პრინციპით მოსახლეობის ინფორმირებას, ასევე გადაწყვეტილი გვაქვს ჩავწეროთ ვიდეორგოლები უხუცეს ადამიანებთან, რომლებიც მოქალაქეებს ვაქცინის გაკეთებისკენ მოუწოდებენ“.
კორონავირუსის შედეგად ხულოში უკვე არაერთი ადამიანი გარდაიცვალა.
