მთავარი,სიახლეები

საია და TI “ოცნებას” უჩივის ბათუმში ადმინისტრაციული რესურსის გამოყენების გამო 

18.08.2021 • 2178
საია და TI “ოცნებას” უჩივის ბათუმში ადმინისტრაციული რესურსის გამოყენების გამო 

„ქართული ოცნების“ მიერ წინასაარჩევნოდ ადმინისტრაციული რესურსის გამოყენებაზე ბათუმის #79-ე საარჩევნო ოლქში საჩივარი ორმა ორგანიზაციამ შეიტანა.

„საერთაშორისო გამჭვირვალობა საქართველო“ და საია ცალ-ცალკე ასაჩივრებენ სამართალდარღვევის შესაძლო ფაქტს.

„ქართული ოცნების“ აჭარის ორგანიზაციაში წინასაარჩევნოდ ადმინისტრაციულ რესურსის გამოყენების ფაქტი „ბათუმელებმა“ 16 აგვისტოს გამოაქვეყნა. კომპანია „ბათუმის წყალმა“ მმართველი პარტიის ოფისში საკუთარი ავტომობილით სკამები მიიტანა.

ბათუმის #79-ე  საარჩევნო ოლქის ხელმძღვანელი ციალა შავაძე „ბათუმელებთან“ ამბობს, რომ ოლქი 10 დღის ვადაში განიხილავს საჩივრებს და შესაბამის გადაწყვეტილებას მიიღებს.

იმ შემთხვევაში, თუ ოლქი დარღვევად მიიჩნევს ამ ფაქტს, მაშინ მმართველ პარტიას 2 ათასი ლარით დააჯარიმებენ.

საარჩევნო კოდექსის 48-ე მუხლის თანახმად, წინასაარჩევნო აგიტაციისას და კამპანიისას ადმინისტრაციული რესურსების გამოყენება აკრძალულია. მათ შორის, იკრძალება კამპანიის პერიოდში მუნიციპალიტეტის ორგანოების საკუთრებაში არსებული სატრანსპორტო საშუალებების გამოყენება.

„ბათუმის წყალი“ კერძო სამართლის იურიდიული პირია, თუმცა ის ბათუმის მერიის დაარსებულია და კომპანიის 100%-იან წილსაც ბათუმის მერია ფლობს. ბათუმის მერი ნიშნავს და ათავისუფლებს კომპანიის დირექტორსაც. „ბათუმის წყალი“ ნაწილობრივ ფინანსდება ბათუმის მერიისგან, რაც იმას ნიშნავს, რომ კომპანია ბიუჯეტიდან ანუ მოქალაქეების მიერ გადახდილი გადასახადებიდან გარკვეულ თანხას იღებს.

საქართველოში 2 ოქტომბერს ტარდება ადგილობრივი თვითმმართველობის არჩევნები. შესაბამისად, ბათუმიც ირჩევს ახალ საკრებულოსა და მერს. დღეს მოქმედი საკრებულო და მერის მოვალეობის შემსრულებელი, რომელიც „ქართული ოცნების“ მერობის კანდიდატია, პირდაპირ ზედამხედველობენ „ბათუმის წყალს“.

გადაბეჭდვის წესი


ასევე: