საქართველოს ჯანდაცვის მინისტრის, ეკატერინე ტიკარაძის განცხადებით, აჭარაში ოჯახის ექიმების დასახმარებლად კიდევ 100 ექიმს გაუფორმეს კონტრაქტი, რომლებიც დისტანციურად იმუშავებენ პაციენტებთან. ეს განმარტება მინისტრმა მას შემდეგ გააკეთა, როცა მას ჟურნალისტებმა ოჯახის ექიმების რესურსის შესაძლო ამოწურვაზე და ამ მხრივ შექმნილ პრობლემებზე ჰკითხეს.
საუბარი ეხებოდა შემთხვევებს, როცა მოქალაქეები ჩივიან, რომ ოჯახის ექიმთან დაკავშირებას ვერ ახერხებენ და ამის გამო მათ მაღალი ტემპერატურით მოუხდათ კლინიკებში მისვლა და რიგში ჩადგომა.
ეკატერინე ტიკარაძის თქმით, აჭარაში მიმდინარე პროცესის სირთულეებთან დაკავშირებით მას ჰქონდა კომუნიკაცია აჭარის ჯანდაცვის მინისტრთან, ნინო ნიჟარაძესთან და აქვს ინფორმაცია, რომ „ასი დაკონტრაქტებული ექიმი დამატებით ჩაერთვება მართვის პროცესში“.