Batumelebi | „ნუ წახვალ ქორწილში, სამედიცინო რესურსიც ამოწურვადია!“ – აჭარის ჯანდაცვის მინისტრი „ნუ წახვალ ქორწილში, სამედიცინო რესურსიც ამოწურვადია!“ – აჭარის ჯანდაცვის მინისტრი – Batumelebi
RU | GE  

„ნუ წახვალ ქორწილში, სამედიცინო რესურსიც ამოწურვადია!“ – აჭარის ჯანდაცვის მინისტრი

აჭარის ჯანმრთელობისა და სოციალური დაცვის მინისტრმა, ნინო ნიჟარაძემ პირველ აგვისტოს ფეისბუქზე მოსახლეობას ნიღბის ტარებისკენ, დისტანციის დაცვისა და აცრისკენ მოუწოდა.

„სამედიცინო რესურსიც ამოწურვადია! ნუ გამართავ ქორწილს! ნუ წახვალ ქორწილში! ატარე ნიღაბი! დაიცავი დისტანცია! აიცერი! ასე რთულია ეს ყველაფერი?“ – წერია ჯანდაცვის მინისტრის პოსტში.

„ბათუმელებმა“ დღეს აჭარის ჯანდაცვის მინისტრს აჭარაში არსებული ეპიდსიტუაციის შეფასება სთხოვა.

  • გუშინდელი პოსტით სოციალურ ქსელში აცრის, დისტანციის დაცვისა და ქორწილებისგან თავშეკავებისკენ მოუწოდეთ საზოგადოებას.

ეს იყო ძალიან ზოგადი მოწოდება მოქალაქეების, მოსახლეობისთვის, რა უნდა გავითვალისწინოთ იმისთვის, რომ ეპიდსიტუაცია  გვქონდეს სტაბილური, აუცილებელია დავიცვათ გონივრული  შეზღუდვები, რაც დღესდღეობით გვაქვს, კერძოდ: დახურულ სივრცეში სავალდებულოა ნიღბის მოხმარება, აუცილებელია სოციალური დისტანცია და თავყრილობების მინიმუმამდე დაყვანა. რაც მთავარია, აუცილებლად უნდა ჩავიტაროთ ვაქცინაცია, მით უფრო, რომ უკვე არსებობს არჩევანის შესაძლებლობა.

  • გაქვთ თუ არა კომუნიკაცია შესაბამის უწყებასთან, ვისაც ევალება გაკონტროლდეს ქორწილების, ქელეხების ჩატარების აკრძალვა, მასობრივი შეკრებების აკრძალვა.  რამდენად ეფექტურია მონიტორინგი, დარღვევებზე რამდენად რეაგირებს შესაბამისი უწყება?

მარეგულირებელ საკითხებზე გადაწყვეტილებას იღებს საკოორდინაციო საბჭო. დღესდღეობით კონტროლის ადმინისტრირება უფრო მკაცრია და ამას შესაბამისი უფლებამოსილი უწყებები ახორციელებენ.

ჯანდაცვის სამინისტროს აქვს საკომუნიკაციო უფლებამოსილება და ჩვენ მოსახლეობის ცნობიერებაზე ვმუშაობთ, ვაკეთებთ განცხადებებს მოქალაქეების საყურადღებოდ, რათა თავიდან ავიცილოთ ეპიდსიტუაციის მომდევნო დამძიმება.

  • რამდენი საწოლია მობილიზებული ამჯერად აჭარაში, რამდენია თავისუფალი, ზოგადად, როგორ უმკლავდება სამედიცინო რესურსი არსებულ ეპიდსიტუაციას?

დღევანდელი სამედიცინო რესურსი საჭიროებებს უმკლავდება, 706 საწოლია მობილიზებული და  120 საწოლი თავისუფალია დღევანდელი მდგომარეობით.

მომდევნო პერიოდში მდგომარეობის შესაძლო გაუარესების შემთხვევაშიც ჯანდაცვის სამინისტროს აქვს შესაბამისი გეგმა, რომელსაც ათანხმებს საქართველოს ჯანდაცვის სამინისტროსთან. მინდა ვთქვა, რომ არსებობს შესაბამისი მზაობა მდგომარეობის გაუარესების შემთხვევაშიც.

ყველა კლინიკას აქვს ასევე საკმარისი რაოდენობის სასუნთქი აპარატი. აბსოლუტურად ყველა კლინიკას.

  • საზოგადოებრივ ტრანსპორტში აღარ კონტროლდება პირბადის ტარება, დახურულ სივრცეებშიც მოქალაქეების კეთილ ნებაზეა დამოკიდებული პირბადის ტარება, ნაკლებად გვესმის, რომ ვინმე დაეჯარიმებინოთ ქორწილებისა და ქელეხების გადახდისთვისაც…

წესებისა და შეზღუდვების დაცვის პასუხისმგებლობები თანაბრად უნდა გაინაწილოს სახელმწიფომ და თითოეულმა მოქალაქემ, ეს ვერ იქნება მხოლოდ მაკონტროლებლის პასუხისმგებლობა. ჩვენ უნდა გამოვიჩინოთ სოციალური, მოქალაქეობრივი პასუხისმგებლობა და მაქსიმალური სერიოზულობით მოვეკიდოთ ყველა წესის დაცვის აუცილებლობას.

  • ხომ არ ფიქრობთ, რომ ზაფხულის დასაწყისში შეზღუდვების მოხსნამ შექმნა სწორედ მზარდი რაოდენობა კოვიდშემთხვევებისა?

დღეს რა შეზღუდვებიც მოქმედებს, ადეკვატურია მოცემული ეპიდვითარებისა, ეს გადაწყვეტილებები საკოორდინაციო საბჭოზე მიიღება.

  • ზოგადად, როგორ შეაფასებდით ეპიდვითარებას იმ პირობებში, როცა დღევანდელი შემთხვევების რაოდენობა აჭარაში თითქმის 400-ია, რეგიონის კოვიდკლინიკებში კი 715 ადამიანი მკურნალობს?

ეპიდსიტუაცია საკმაოდ საყურადღებოა. უკანასკნელი ერთი კვირის განმავლობაში ერთ დონეზე ვდგავართ, როგორი ეპიდსიტუაცია იქნება მომავალში, დამოკიდებულია თითოეული ჩვენგანის ქცევასა და პასუხისმგებლობაზე, წესების დაცვაზე.

ვიმეორებ, რომ არსებობს შესაძლებლობა აცრისა, არსებობს სამედიცინო დაწესებულებების მხრიდან მზაობა და ვართ ვალდებულები მივმართოთ ამ დაწესებულებებს, ჩავიტაროთ ვაქცინაცია.

ვიცით, რომ ყველა ვაქცინა იცავს ჰოსპიტალიზაციისგან და კოვიდით გარდაცვალებისგან. შესაძლებელია  დაინფიცირდეს სრულად აცრილიც, რაც ძალიან იშვიათად ხდება, მაგრამ ამ დროს დაავადება მიმდინარეობს მსუბუქად. აქ გასათვალისწინებელია თანმხლები დაავადებებიც. არ გვაქვს ინფორმაცია, რომ აცრილი დაინფიცირდა და მძიმედ გადაიტანა კოვიდი ან ლეტალურად დასრულდა აცრის შემდეგ ვინმეს შემთხვევა, ასეთი მაგალითები არ გვაქვს.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com