[crosslist]
- Item 1
- Item 2
- Item 3
[/crosslist]
დაავადებათა კონტროლისა და საზოგადოებრივი ჯანდაცვის ცენტრის დირექტორის, ამირან გამყრელიძის განცხადებით, ქვეყანაში ამ ეტაპზე შემოსულია „ფაიზერის“ 28 ათასი დოზა, რაც საკმარისია 14 ათასი ადამიანის ასაცრელად.
ამირან გამყრელიძის განცხადებით, „ფაიზერის“ ეს პარტია საქართველომ მიიღო სახელმწიფოსა და კომპანიას შორის დადებული ხელშეკრულების თანახმად.
„ესაა პირველი პარტია მილიონდოზიანი ხელშეკრულების, მეორე-მესამე პატრია უნდა შემოვიდეს თანდათან და მილიონი დოზა უნდა ჰქონდეს ქვეყანას წლის ბოლომდე“ – განაცხადა ამირან გამყრელიძემ.
მისი თქმით, „ფაიზერით“ აცრები ამ ეტაპზე დაიწყება სამ ქალაქში – ბათუმში, ქუთაისსა და თბილისში.
„ფაიზერით“ ვაქცინაციისთვის რეგისტრაცია მოქალაქეებს დღეს, 15:00 საათიდან შეეძლებათ, აცრის პროცესი კი 16 ივლისიდან დაიწყება.
რეგისტრაციისთვის უნდა შეხვიდეთ ამ ბმულზე.
ჯანდაცვის სამინისტროს ცნობით, ვაქცინის დაჯავშნა შესაძლებელია უშუალოდ დაწესებულების ცხელ ხაზზე. გარდა ამისა, ვაქცინაციაზე რეგისტრაციისთვის მოქმედებს ერთიანი სამთავრობო ცხელი ხაზის სპეციალური ნომერი – 144-3.
სამინისტრო აცხადებს, რომ ვაქცინაციის მსურველებს დარეგისტრირება შეუძლიათ პირდაპირ კლინიკაში ვიზიტის დროსაც.
„ფაიზერის“ ვაქცინაციისთვის საჭირო 2 დოზა 21-28 დღის ინტერვალით კეთდება.
