საპარლამენტო ოპოზიციის განცხადებით, ღარიბაშვილი და მისი მთავრობა ქვეყანას უფსკრულისკენ მიაქანებს. ოპოზიციამ განცხადება დღეს, 12 ივლისს, საგანგებო ბრიფინგზე გააკეთა.
„ლელოს“ ერთ-ერთი ლიდერი მამუკა ხაზარაძე აცხადებს, რომ ბოლო პერიოდში განვითარებული პროცესები არის დადასტურება იმის, რომ ღარიბაშვილი ქვეყნის კურსს ცვლის.
„ეს არის რუსული კურსი, რომელსაც ღარიბაშვილი ივანიშვილის ჩაწოდებით ახორციელებს, რომელიც ემსახურება ჩვენი ქვეყნის დაქუცმაცებას, საზოგადოების დაშლას სხვადასხვა ინტერესებად.
ჩვენ კატეგორიულად მოვითხოვთ ამ პროცესის შეჩერებას. ამ პროცესის შეჩერების ერთადერთი სამართლებრივი გზა არის პრემიერ-მინისტრის გადადგომა დაკავებული თანამდებობიდან.
ადამიანები თუ ვერ ამჩნევენ, თუ რა პოლიტიკა ხორციელდება ბოლო წლების განმავლობაში „ქართული ოცნების“ ხელმძღვანელობით, თუ ვერ ამჩნევენ რა უბედურებაში, გაჭირვებაში შეიყვანა „ქართულმა ოცნებამ“ ჩვენი ქვეყანა, თუ ეს ადამიანები ვერ ამჩნევენ როგორ შეიცვალა ჩვენი ქვეყნის საგარეო კურსი, ნებსით თუ უნებლიეთ, ემსახურებიან ოკუპანტის ინტერესებს.
ამიტომ „ქართულ ოცნებას“ მოუწევს ამ პროცესებზე პასუხისმგებლობის აღება. ისინი იქნებიან მარტო ამ პარლამენტში, რადგან ღარიბაშვილი და მისი მთავრობა მიაქანებს ჩვენს ქვეყანას უფსკრულისკენ“ – აცხადებს მამუკა ხაზარაძე.
მისი თქმით, ნებისმიერი რიტორიკა და ნებისმიერი ბრალდება, რაც მესიჯბოქსად აქვს ხელისუფლებას გამოყენებული, ფუჭია.
„ეკლესიის გამოყენება, ლგბტ თემის გამოყენება და ასე შემდეგ არის ფუჭი, ჩვენ დღეს ვაპროტესტებთ ჟურნალისტებზე თავდასხმას, ჩვენ ვაპროტესტებთ რუსულ კურსს, ვაპროტესტებთ შარლ მიშელის დოკუმენტის არშესრულებას, მოსამართლეების ასე სწრაფად დანიშვნის პროცესს, რომელიც მათ „ნაციონალური მოძრაობიდან“ გადმოიბარეს და ჩააცემენტეს ამ ქვეყანაში.
დღეს ჩვენ ვაპროტესტებთ იმ უიმედობას, რომელიც ქართულმა ოცნებამ დააფუძნა ამ ქვეყანაში. ამიტომ, გამოსავალი არის ერთი, მშვიდობიანი პროტესტი, გარდამავალი მთავრობა და ადგილობრივი არჩევნების მშვიდ მდგომარეობაში ჩატარება. მანამდე „ქართული ოცნება“ იქნება მარტო,“ – აცხადებს მამუკა ხაზარაძე.
