„მნიშვნელობა არ აქვს რა მიზეზით დაისაჯ… დაიღუპა ბატონი ალექსანდრე ლაშქარავა“ – განაცხადა დღეს, 12 ივლისს, პრემიერ-მინისტრმა ირაკლი ღარიბაშვილმა.
მან დღეს კიდევ ერთხელ გააჟღერა თავისი ვერსია იმის შესახებ, რომ 5 ივლისის და შემდგომი მოვლენები, როცა საპატრიარქოს მიერ ორგანიზებული ძალადობრივი აქციის მონაწილეები ჟურნალისტებს და მოქალაქეებს დაესხნენ თავს, არის „ანტისახელმწიფოებრივი და ანტიეკლესიური ძალების“ „რევანშისტული, რადიკალური შეთქმულება“.
„ყველა მოძალადე იქნება მთელი სიმკაცრით დასჯილი. პოლიციამ უკვე დააკავა 4 პირი, რომლებიც ჩართული იყვნენ აღნიშნული პირის ცემის საქმეში“, – განაცხადა მან.
ოპერატორი ალექსანდრე ლაშქარავა, რომელსაც 5 ივლისს საპატრიარქოს ორგანიზებით შეკრებილი ძალადობრივი ჯგუფის წევრები მოძრაობა „სირცხვილიას“ ოფისში ფიზიკურად გაუსწორდნენ, 11 ივლისს საკუთარ სახლში გარდაცვლილი იპოვეს.
შინაგან საქმეთა სამინისტრომ განაცხადა, რომ გამოძიება დაიწყო და სიკვდილის მიზეზის დასადგენად ტარდება სასამართლო-სამედიცინო ექსპერტიზა.
მედიის საკითხებზე მომუშავე არასამთავრობო ორგანიზაციები, ასევე მედიასაშუალებების წარმომადგენლები, 5 ივლისის ძალადობის გამო პასუხისმგებლობას ხელისუფლებას აკისრებენ და შესაბამისად, ითხოვენ პრემიერ-მინისტრისა და შინაგან საქმეთა მინისტრის გადადგომას.
