ნეტგაზეთი • RU

დააკავებს თუ არა შსს ძალადობის მონაწილე მღვდლებს

შს სამინისტროს ვკითხეთ, მიმდინარეობს თუ არა რაიმე სახის საგამოძიებო მოქმედებები ორი მღვდლის – დიაკონ ნიკოლოზ კუპრეშვილისა და დეკანოზ სპირიდონ ცქიფურიშვილის წინააღმდეგ. ეს ის ორი მღვდელია, ვისთვისაც გამოძიებას წესით კითხვები უნდა დაესვა: ერთ-ერთი მათგანი ღიად მოუწოდებდა ძალადობისკენ, მეორემ კი პირადად სცემა ჟურნალისტს, როგორც ამას დაზარალებული აცხადებს.

ტვ პირველის ჟურნალისტის, მირანდა ბაღათურიას თქმით, 5 ივლისს, „სირცხვილიას“ ოფისის სადარბაზოში, სწორედ მის მიმართ ფიზიკური ძალადობის დაწყება გახდა მასობრივი თავდასხმის დაწყების ნიშანი, რა დროსაც 20-მდე პირი სასტიკად გაუსწორდა ლექსო ლაშქარავას. მირანდა ბაღათურიას მონათხრობის თანახმად, მასზე პირველად ხელი მღვდელმა აღმართა.

ტვ პირველის მიერ იდენტიფიცირებული პირი დიაკონი ნიკოლოზ კუპრეიშვილია. მირანდა ბაღათურაის თქმით, სწორედ ამ მღვდელმა, პირველმა მოქაჩა თმაზე და უთხრა, რომ ახლა მაინც გააჩუმებდა, შემდეგ კი სხვებმა წიხლები ჩაარტყეს. როგორც ჟურნალისტი აცხადებს, მისი დაცვა სცადა ლექსო ლაშქარავამ, რომელსაც დაახლოებით 20 კაცი თავს დაესხა და მძიმე დაზიანებები მიაყენეს.

შს სამინისტროს „ბათუმელებმა“ ასევე ჰკითხა დეკანოზ სპირიდონ ცქიფურიშვილთან დაკავშირებით თუ მიმდინარეობს რაიმე სახის საგამოძიებო მოქმედება. მღვდელმა, 5 ივლისს ამ სიტყვებით მიმართა რუსთაველის გამზირზე შეკრებილებს: “არა ძალადობას კი არა, ვალდებულები ხართ, იძალადოთ სამშობლოსთვის, იძალადოთ ღმერთისთვის, იძალადოთ სიწმინდისთვის”.

შს სამინისტროს პრესცენტრში კითხვებზე არაფერი გვიპასუხეს.

დღეს, 11 ივლისს, ტვ პირველის ოპერატორი ლექსო ლაშქარავა საკუთარ სახლში იპოვეს გარდაცვლილი.

____

მთავარი ფოტო: დეკანოზი სპირიდონ ცქიფურიშვილი და დიაკონი ნიკოლოზ კუპრეიშვილი

___

ამავე თემაზე:

როგორ გახდა საპატრიარქო ძალადობრივი აქციის ორგანიზატორი – ფაქტები

___

 

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან