Batumelebi | ევროპაში კოვიდის შემთხვევების 33%-იანი ზრდაა – ჯანმო ევროპაში კოვიდის შემთხვევების 33%-იანი ზრდაა – ჯანმო – Batumelebi
RU | GE  

ევროპაში კოვიდის შემთხვევების 33%-იანი ზრდაა – ჯანმო

„არ ვართ კარგ პოზიციაში… ორ ათეულზე მეტ ქვეყანაში ეპიდემიური მრუდი ახლა თითქმის სრულად ვერტიკალურია” –  აცხადებს მარია ვან კერჰოვი, ჯანმრთელობის მსოფლიო ორგანიზაციის ეპიდემიოლოგიის მიმართულების ტექნიკური ხელმძღვანელი.

„აფრიკაში ბოლო 7 დღის განმავლობაში 16.7% -ით გაიზარდა კორონავირუსით ინფიცირების ახალი შემთხვევები, აღმოსავლეთ ხმელთაშუაზღვის რეგიონში – 16.4% -ით. ევროპაში შემთხვევების 33% -იანი ზრდაა. 8.6% – ით გაიზარდა ინფიცირების შემთხვევები სამხრეთ – აღმოსავლეთ აზიაში. წყნარი ოკეანის დასავლეთ ნაწილში 10% -იანი ზრდაა.

ამ ეტაპზე ორ ათეულზე მეტი ქვეყანაა, რომელთა ეპიდემიური მრუდი თითქმის სრულად ვერტიკალურია. როდესაც ხელთ გვაქვს ინსტრუმენტები, ეს არ არის სიტუაცია, რომელშიც უნდა ვიყოთ ახლა”, – განაცხადა მან 8 ივლისს ჯანმოს ბრიფინგზე.

მარია ვან კერჰოვი ამბობს, რომ ინფიცირების შემთხვევათა გლობალური ზრდა რამდენიმე ძირითად მიზეზს უკავშირდება: ვირუსის ახალ ვარიანტებს, გაზრდილ სოციალურ კონტაქტებს და მობილობას, კორონავირუსის საწინააღმდეგო რეკომენდაციების არასათანადო დაცვასა და ვაქცინების არასწორ გადანაწილებას.

„თუ თქვენთან ცირკულირებს ვირუსის ახალი ვარიანტები, თუ თქვენთან გაზრდილია სოციალური კონტაქტები, თუ არ ხდება ნორმების სათანადოდ დაცვა და თუ მოწყვლადი მოსახლეობა გყავთ – ვირუსი ძალიან სწრაფად გავრცელდება. ეს არ არის თეორია. ჩვენ ახლა არ ვსაუბრობთ სიტუაციაზე – „რა მოხდება“. ეს ახლა ხდება.

მოდით, გამოვიყენოთ ინსტრუმენტები, რომლებიც გავრცელების შესამცირებლად გვაქვს და ვიყოთ გონიერები. გავაკეთოთ ის, რაც შეგვიძლია ინდივიდუალურ დონეზე, ყველამ უნდა შევასრულოთ ჩვენი როლი, რომ შევამციროთ გავრცელება. ახლა ვირუსს ვყავართ ხელში გამოჭერილი. საჭიროა, ჩვენ დავიბრუნოთ კონტროლი მასზე“, – განაცხადა მარია ვან კერჰოვმა. 

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან