ავტორი: მარიკა ბოლქვაძე
18 წლის ბათუმელი ალექსანდრე აბუსელიძე არის ბიჭი, რომელიც ახალ სიცოცხლეს სძენს ასანთის ღერებს. იგი უზარმაზარ და რთულ კონსტრუქციებს აგებს ასანთის ღერებით.
ასანთის ღერებით შენება ალექსანდრეს ჰობია და მას საკმაოდ დიდ დროს უთმობს. ამ საქმის კეთება მისთვის დასვენებასთან და განტვირთვასთან ასოცირდება.
„ორი წლის წინ, ზაფხულში, დროის გაყვანის მიზნით დავიწყე მშენებლობა ასანთის ღერებით.
ნახაზი არ მჭირდება. ვარ თვითნასწავლი და შემიძლია ავაწყო ყველა სახის ნაგებობა.
ალექსანდრე აბუსელიძის ნამუშევარი
დროის ფაქტორის გათვალისწინებით, მეხუთე ნაგებობას ვაწყობ და ეს არის „ბიგ ბენი“. მანამდე ავაწყვე: საზაფხულო სახლი ასანთის 15 000 ღერისგან; ამერიკული „ემფაიერ სთეით ბილდინგი“ – 15 000 ღერი ასანთისგან; ელექტრონული წისქვილი – 10 000 ღერი ასანთისგან; ყველაზე მასშტაბური კი არის სკოლა „ნიკეს“ შენობა, რომლის ასაწყობად 40 000 ღერი ასანთი დამჭირდა“ – ამბობს ალექსანდრე.
კითხვაზე, როგორ გაუჩნდა ასანთის ღერებით შენების სურვილი, ალექსანდრე გვპასუხობს, რომ ეს ტექნიკა ინტერნეტში ნახა:
„yootube-ში ვნახე პატარ- პატარა მაკეტები და დავუსვი თავს კითხვა – მე შევძლებ უფრო მასშტაბური მაკეტების აწყობას? რატომაც არა? და დავიწყე“.
ასანთის ღერების გარდა ალექსანდრეს „მშენებლობისთვის“ სილიკონის ცხელი წებო და სახაზავი სჭირდება:
„სახაზავი იმიტომ, რომ ასანთის ღერები შესაბამისი ზომებით უნდა გაიჭრას, რათა სიმეტრიულად სწორი გამოვიდეს შენობა. როგორც ვთქვი, ნახაზი არ მჭირდება – პირდაპირ ფოტოდან კოპირებით ვაწყობ ანუ თვალზომით“, – გვიყვება ალექსანდრე.
ასანთის ღერებით შენებას დიდი მოთმინება და შესაბამისი გარემო სჭირდება. „როგორია შენი სამუშაო ოთახი და როგორ ახერხებ კონცენტრირებას ნამუშევარზე?“ – ვკითხეთ ალექსანდრეს.
„ჩემი სამუშაო ოთახი არის ჩემი სამეცადინო კაბინეტიც. მაკეტების აწყობას ვუთმობ დღეში 1 საათს, დროის ფაქტორის გამო.
დიახ, მაკეტების აწყობას სჭირდება კარგი ნერვები, ამიტომ ზოგს უკვირს და ამბობს – ვააა, რა ნერვები და გამძლეობა ჰქონიაო. ზოგადად ჩემთვის აწყობის პროცესი ერთგვარი მედიტაციაა, განტვირთვა,“ – ამბობს ალექსანდრე.
ალექსანდრე აბუსელიძე
ალექსანდრე აბუსელიძის ნამუშევარი
ახლა აბიტურიენტია, მას სამართლის შესწავლა სურს. ალექსანდრემ სკოლა „ნიკე“ დაამთავრა და ამავე სკოლის თვითმმართველობის თავმჯდომარე იყო.
ალექსანდრე ამბობს, რომ მისთვის არც ისე ადვილია შეუთავსოს აქტიური აბიტურიენტობის პერიოდი ჰობის, სწორედ ამიტომ ცოტა ხნით მუშაობის დროზე შეამცირა, თუმცა დროებით.
ალექსანდრე აპირებს გააგრძელოს შენება ასანთის ღერებით და სჯერა, რომ ერთ დღეს აუცილებლად შეძლებს ასანთის ღერებისგან აშენებული მაკეტების ნაცვლად რეალურად ნახოს მისთვის საოცნებო შენობები მთელს მსოფლიოში.
