Batumelebi | მოძალადე ჯგუფები 40-მდე ჟურნალისტს თავს დაესხნენ – შსს-ს ამ დრომდე არავინ დაუკავებია მოძალადე ჯგუფები 40-მდე ჟურნალისტს თავს დაესხნენ – შსს-ს ამ დრომდე არავინ დაუკავებია – Batumelebi
RU | GE  

მოძალადე ჯგუფები 40-მდე ჟურნალისტს თავს დაესხნენ – შსს-ს ამ დრომდე არავინ დაუკავებია

5 ივლისს თბილისში დაგეგმილი „ღირსების მარშის“ წინააღმდეგ საპატრიარქოს ორგანიზებული ძალადობრივი ჯგუფები ქალაქის სხვადასხვა უბანში თავს ესხმიან მედიის წარმომადგენლებს. ასევე დაარბიეს „სირცხვილიასა“ და „თბილისი პრაიდის“ ოფისები. დაშავებულია, სულ მცირე, მედიის 38 წარმომადგენელი.

მათ შორის არიან „რადიო თავისუფლების“ გადამღები ჯგუფი, ჟურნალისტი თორნიკე მანდარია, რომელსაც ჩამტვრეული აქვს კბილები. ასევე ნაცემია „რადიო თავისუფლების“ ოპერატორი დათო ქორიძეც, რომელსაც დაზიანებები თავის არეში აქვს მიყენებული.

დათო-ქორიძე-თორნიკე-მანდარია

“ტვ პირველის” პროდიუსერის ინფორმაციით, დაშავებული არიან მათი არხის ჟურნალისტები და ოპერატორები. მისივე თქმით, დაზიანებულია სამაუწყებლო აპარატურა, რის გამოც ადგილიდან სიგნალები გაეთიშათ.

ალექსანდრე ლაშქარავა და ლევან ბრეგვაძე

“ფორმულას” ჟურნალისტს, გუგა დვალიშვილს მიკროფონი წაართვეს და ხელიდან გააგდებინეს. ასევე, მოუწოდეს, დაეტოვებინა ტერიტორია. ფორმულას ოპერატორს მიაყენეს ფიზიკური შეურაცხყოფა. ასევე, სცემეს „ფორმულას“ სხვა გადამღებ ჯგუფს – გიორგი გაბუნიას და ლექსო ხომასურიძეს. ნაცემია ჟურნალისტი რატი წვერავა, რომელმაც პოლიციაში ჩვენება უკვე მისცა. „ფორმულასთან“ საუბრისას მან თქვა, რომ მოძალადეების თავდასხმისას პრაქტიკულად არ გამოჩენილა პოლიციელი, რომელიც მას დაიცავდა.

„დაახლოებით 200 მეტრის მანძილზე დავდიოდი და მირტყამდნენ. თავი დახრილი მქონდა, ვიგუდებოდი, ვერ ვლაპარაკობდი და ვთხოვდი, იქნებ ვინმე დამეხმაროს-მეთქი. დახმარება კი არა, ყველა მირტყამდა გამეტებით. არ აინტერესებდათ, ადამიანი იყავი, ვინ იყავი… უბრალოდ უნდოდათ, მოვეკალი. ერთი ნაბიჯი არის იქამდე, რომ ამ ადამიანებმა მოგკლან. ”

ფოტოზე: რატი წვერავა

ჰომოფობიურად განწყობილი მოქალაქეები თავს დაესხნენ აჭარის საზოგადოებრივი მაუწყებლის გადამღებ ჯგუფსაც. ტელევიზიის ინფორმაციით, დაშავებულია ჟურნალისტი თიკო სუსარეიშვილი, რომელიც კონტრაქციას აშუქებდა. ჰომოფობიური აქციის მონაწილეები მას ფიზიკურად გაუსწორდნენ და თავში ჩაარტყეს. თიკო სუსარეიშვილი იხსენებს, რომ ტერიტორიიდან საპატრულო პოლიციის მანქანით გამოიყვანეს. აგრესიულად განწყობილმა პირებმა კი სამართალდამცველების ავტომობილიც დააზიანეს.

თიკო სუსარეიშვილი

დაშავდა „ინტერპრესნიუსის“ ფოტოკორესპონდენტი გიორგი ნიკოლიშვილი

„პალიტრანიუსის“ ჟურნალისტი ნინი თვარაძე წერს, მათ ოპერატორს აქციაზე ჩაუმსხვრიეს სახის ძვლები და მას ამ წუთებში ოპერაცია უტარდება.

„ჩვენი ჟურნალისტები (გოგოები) წიხლებით არიან ნაცემები. ფოტოგრაფი დასახიჩრებული, აპარატურა განადგურებული. სხვა ტელევიზიებშიც ანალოგიური და ზოგან კიდევ უარესი სიტუაციაა”, – წერს ჟურნალისტი საკუთარ ფეისბუქგვერდზე.

ფიზიკური შეურაცხყოფა მიაყენეს და ორი კამერა დაუმტვრიეს „რუსთავის 2-ის“ ჟურნალისტებსა და ოპერატორებსაც. ამ დროისთვის ცნობილია, რომ მათ შორის არიან: მარიამ ქუმსიშვილი – ჟურნალისტი, მარიკა გოცირიძე – ჟურნალისტი, გიორგი პერტია – ჟურნალისტი, სალომე ბოკუჩავა – ჟურნალისტი, შოთა სიკინჭალაშვილი – ოპერატორი, ზურა მანაგაძე – ოპერატორი, ბექა ათაბეგაშვილი – ოპერატორი.

„მთავარი არხის“ დირექტორის, ნიკა გვარამიას განცხადებით, დაზიანებები აქვთ მიღებული: დეა მამისეიშვილს, ირაკლი ბახტაძეს, ნინო გაზდელიანს, დათუნა ახალაძეს, ანრი ჯოხარიძეს, ქეთა ციცქიშვილს და თორნიკე ბარნაბიშვილს.

ფიზიკურად გაუსწორდნენ „ტაბულას“ ჟურნალისტ მაკო ჯაბუას. ადგილზე მუშაობის საშუალება არ მიეცათ „ნეტგაზეთისა“ და On.ge-ს ჟურნალისტებს.

საზოგადოებრივი მაუწყებლის პირველი არხის ინფორმციით, თავს ასევე დაესხნენ მაუწყებლის ოპერატორს, ილია თვალიაშვილს.

შსს-ს ამ დრომდე არავინ დაუკავებია. უწყების განცხადებით, შესწავლილი იქნება ინციდენტების ამსახველი ყველა მასალა.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან