მოქალაქე მურმან კილაძე ბათუმში, სახოკიას ქუჩაზე ცხოვრობს. მისი განცხადებით, მის საკუთრებაში მაღალი ძაბვის გადამცემი ხაზები გადის, რომელიც ტექნიკური გაუმართაობის გამო რამდენჯერმე ჩამოვარდა და პრობლემები შექმნა. გარდა ამისა, ამირან კილაძე ამბობს, რომ ელექტროხაზები მის საცხოვრებელთან ძალიან ახლოსაა, რის გამოც მშენებლობას ვერ იწყებს.
„საცხოვრებელი რვა წლის წინ შევიძინე, სახლი ძველია და მინდა ახალი ავაშენო, მაგრამ იმ ადგილთან, სადაც მშენებლობის დაწყებას ვაპირებ, გადამცემი ხაზები ძალიან ახლოსაა და ფაქტობრივად სიმაღლეში ვერ წავა მშენებლობა. მიწა ჩემი საკუთრებაა და ბუნებრივია მინდა ჩემი საჭიროებისამებრ გამოვიყენო, ამ ელექტროხაზების გამო კი მშენებლობას ვერ ვიწყებ.“
მურმან კილაძის თქმით, ელექტროხაზი რამდენჯერმე ჩამოვარდა: „ბოლოს 30 დეკემბერს ჩამოვარდა ხაზი, მოვიდნენ ენერგოკომპანიიდან, გააკეთეს, მაგრამ გაგვაფრთხილეს, ბოსტნის ტერიტორიაზე არ შეხვიდეთო. მე ხომ მაქვს უფლება ჩემი საკუთრება გამოვიყენო? ამიტომ მინდა მოვიდნენ ენერგოკომპანიის წარმომადგენლები და გაარკვიონ შესაძლებელია თუ არა ამ ხაზების გადატანა“.
ენერგო-პრო ჯორჯიას საზოგადოებასთან ურთიერთობის სამსახურის ხელმძღვანელის, ავთო დვალიშვილის განმარტებით, მოქალაქე მურმან კილაძემ წერილობით უნდა მიმართოს კომპანიას ვითარების შესასწავლად:
„შესაძლებელია იყოს მარტივად გადასაჭრელი პრობლემა. კერძო საკუთრებაში კომპანია გადამცემ ბოძებს ვერ დადგამს, შესაძლებელია ამ ადამიანმა თვითნებურად შემოღობა ტერიტორია და ახლა ექმნება პრობლემა, მაგრამ თუ ასე არ არის, მივიდეს აჭარის ფილიალში, დაწეროს განცხადება და დაიწყება მოკვლევა“.
ენერგოომბუსმენის წარმომადგენელი აჭარაში, ბექა სიორდიაც ამბობს, რომ მოქალაქემ უნდა მიმართოს ენერგოკომპანიას და განმარტება მოითხოვოს, „გადაწყვეტილება უნდა მიიღოს ენერგოკომპანიამ, “- ამბობს ის.
