2019 წლის მათემატიკისა და საბუნებისმეტყველო საგნების სწავლისა და სწავლების საერთაშორისო კვლევა (TIMSS)-ის მიხედვით, საქართველოს მაჩვენებელი გაუმჯობესებულია, თუმცა მაინც ჩამორჩება საერთაშორისო საშუალო – 500 ქულას.
მეოთხეკლასელების მიღწევები:
- მათემატიკა – 482 ქულა;
- ბუნებისმეტყველება – 454 ქულა;
მერვეკლასელების მიღწევები:
- მათემატიკა – 461 ქულა;
- საბუნებისმეტყველო საგნები – 447 ქულა.
ეს მონაცემები ნიშნავს, რომ 2017-2018 წელს გამოქვეყნებული PISA-ს კვლევების შემდეგ საქართველოს მაჩვენებელი მათემატიკაში დაახლოებით 84 ქულით არის გაუმჯობესებული, ხოლო საბუნებისმეტყველო მეცნიერებებში – 64 ქულით.
მეოთხე კლასის დონეზე, მათემატიკის მიღწევებში რეგიონის ქვეყნებიდან საქართველოს უსწრებს სომხეთი 16 ქულით. ევროპული ქვეყნებიდან საქართველო 3 ქულით საფრანგეთს ჩამორჩება. ხოლო ბუნებისმეტყველებაში საქართველო საერთაშორისო საშუალო დონით 9 ქვეყანას ჩამორჩება, მათ შორის სომხეთს.
საქართველო TIMSS-ის 2019 კვლევის შედეგებში.
მერვეკლასელების მიღწევები მათემატიკაში
აქ საქართველო 26 ქვეყანას ჩამორჩება მიღწევებით. მათ შორის, არაბეთის გაერთიანებულ საემიროებს და ისეთი ქვეყნების გვერდითა დგას, როგორიცაა: მალაიზია, ირანის ისლამური რესპუბლიკა, ყატარი, ჩილე და ასე შემდეგ.
მერვეკლასელების მიღწევები საბუნებისმეტყველო საგნებში
ამ საგნებში საქართველო ჩამორჩება მალტას, ბაჰრეინს, ყაზახეთს, ალბანეთს, ჩილეს, სომხეთს, არაბეთს და ბოსნია ჰერცოგოვინას; უსწრებს მონტენეგროს, ყატარს, ირანს, აზერბაიჯანს, კოსოვოს, საუდის არაბეთს და სხვებს.
მიღწევები სქესის მიხედვით
2019 წლის მონაცემებით, მეოთხეკლასელი ბიჭების მიღწევები სტატისტიკურად მნიშვნელოვნად აღემატება გოგონების მიღწევებს, თუმცა საქართველო იმ 3 ქვეყანას შორის მოხვდა (სამხრეთ კორეა, მალტა, საქართველო), სადაც ეს განსხვავება ყველაზე მცირეა.
მიღწევები სკოლის სტატუსის მიხედვით
2019 წლის მონაცემებით, მათემატიკაში კერძო სკოლების მიღწევები კვლავ აღემატება საჯარო სკოლების შედეგებს, თუმცა თვალსაჩინოა, რომ კერძო და საჯარო სკოლებს შორის სხვაობა მცირდება.
2019 წლის შედეგებით კერძო სკოლების მიღწევები საბუნებისმეტყველო საგნებში (ფიზიკა, ქიმია, ბიოლოგია, გეოგრაფია/დედამიწათმცოდნეობა) კვლავ აღემატება საჯარო სკოლების მიღწევებს, თუმცა კერძო და საჯარო სკოლებს შორის მიღწევებში სხვაობა მცირდება.
მიღწევები ქალაქად და სოფლად
2019 წლის მონაცემებით, სოფლად მცხოვრებმა მეოთხეკლასელებმა სტატისტიკურად მნიშვნელოვნად გააუმჯობესეს მიღწევები.
2017 წლის შემდეგ პირველად, 2019 წლის მონაცემებზე დაყრდნობით შეგვიძლია ვთქვათ, რომ სოფლისა და ქალაქის სკოლებს შორის არსებული განსხვავება სტატისტიკურად მნიშვნელოვანი არ არის და ეს სხვაობა მცირდება.
აღნიშნულ კვლევაში არ არის მოყვანილი წაკითხულის გააზრების კომპონენტი, სადაც საქართველოს 2017-2018 წლის კვლევებით 380 ქულა აქვს.
