Batumelebi | ცესკო ადმინისტრაციული შენობების გარემონტებაში 1,6 მილიონს დახარჯავს ცესკო ადმინისტრაციული შენობების გარემონტებაში 1,6 მილიონს დახარჯავს – Batumelebi
RU | GE  

ცესკო ადმინისტრაციული შენობების გარემონტებაში 1,6 მილიონს დახარჯავს

ცენტრალური საარჩევნო კომისია ადმინისტრაციული შენობების გარემონტებისთვის ჯამში 1 674 500 ლარის დახარჯვას გამარტივებული წესით, ტენდერის გარეშე გეგმავს. თანხმობისთვის ცესკომ შესყიდვების სააგენტოს უკვე მიმართა. სარემონტო-სარეკონსტრუქციო სამუშაოები თვენახევარში უნდა დასრულდეს.

ცესკოს განცხადებით, სარემონტო სამუშაოების ჩატარება აუცილებელია „2021 წლის ადგილობრივი თვითმმართველობის ორგანოთა არჩევნების სათანადო დონეზე ორგანიზებისთვის“.

საარჩევნო კანონმდებლობაში დაგეგმილი ცვლილებების თანახმად, 2021 წლის ოქტომბერში გასამართი ადგილობრივი თვითმმართველობის ორგანოთა არჩევნებისათვის, საარჩევნო ადმინისტრაციაში [ცესკოში, საოლქო საარჩევნო კომისიებში] კომისიის წევრთა რაოდენობა იზრდება 17 ერთეულამდე, რაც მოითხოვს საარჩევნო ადმინისტრაციის შენობების ინფრასტრუქტურის მორგებას ახალ რეალობასთან. დაგეგმილი საკანონმდებლო ცვლილებების მიხედვით, ცესკოსა და საოლქო კომისიების დონეზე ადმინისტრაციას ემატება 370, ხოლო საუბნო კომისიების დონეზე – 19 000 ახალი თანამშრომელი.

ცესკოს შემთხვევაში, დამატებით კომისიის წევრების [მათ შორის ერთი ხელმძღვანელი პირის] განთავსება მოითხოვს არსებული სამუშაო ოთახებიდან თანამშრომელთა გადაყვანას ალტერნატიულ სივრცეებში და მათთვის ახალი სამუშაო ოთახების მოწყობას. კომისიის წევრებისათვის გამოყოფილი სივრცეები მოითხოვს გატიხვრისა და სამუშაო ოთახების მოწყობასთან დაკავშირებულ სარეკონსტრუქციო სამუშაოების ჩატარებას. საკანონმდებლო რეალობიდან გამომდინარე სამუშაო ოთახების ახალი გადანაწილების გამო ცესკო იძულებულია საარჩევნო პერიოდში მოქმედი კონტაქტცენტრი [ცენტრში მუშაობს 25-30 ოპერატორი] გადაიტანოს და მოაწყოს ცესკოს ადმინისტრაციულ შენობაში არსებულ სხვა სივრცეში“ – აღნიშნულია ცესკოს განაცხადში.
ცესკოს ინფორმაციით, საოლქო კომისიების შემთხვევაში, დამატებით კომისიის 5-5 წევრის განთავსება „მოითხოვს ისედაც მცირე ფართობის მქონე საოლქო კომისიების ადმინისტრაციულ შენობებში ალტერნატიული სივრცეების გამოყოფას და ახალი სამუშაო ოთახების მოწყობას, ხოლო სამუშაო ოთახების ახალი გადანაწილება თავის მხრივ საჭიროებს სარეკონსტრუქციო სამუშაოების ჩატარებას“.
სად უნდა ჩატარდეს სამუშაოები [საორიენტაციო თანხის მითითებით] ნახეთ ცხრილში:

წყარო: ცესკო

 
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com