შეფასებისა და გამოცდების ეროვნული ცენტრის ხელმძღვანელის სოფო გორგოძის თქმით, 2021 წლის ეროვნულ გამოცდებზე აუცილებელი მოთხოვნაა, აპლიკანტს გამოცდის პროცესში მხოლოდ სამედიცინო პირბადე ეკეთოს.
„მათ შეუძლიათ მოვიდნენ თავიანთი პირბადეებით, თუმცა ჩვენ ადგილზე გვექნება ასევე პირბადეები და გამოცვლის შემთხვევაში, როცა ამის სურვილი ექნებათ, გამოვუცვლით“, – ამბობს სოფო გორგოძე.
ეს იმას ნიშნავს, რომ აპლიკანტი გამოცდაზე ნაჭრის ან სხვა ქსოვილის პირბადით ვერ შევა. მას აუცილებლად სამედიცინო პირბადე უნდა ეკეთოს.
პირბადის გარდა დარჩა ძალაში სხვა იგივე მოთხოვნები, რაც გასულ წელს იყო დაწესებული ჯანდაცვის უწყებების მიერ.
- გასული წლის მსგავსად, გამოსაცდელთა და მეთვალყურეთა დაშვება მოხდება მხოლოდ ყოველი საგამოცდო სექტორის ფართობის 50%-ზე
- თითოეული სამუშაო მაგიდა წინა მხრიდან აღჭურვილი იქნება გამჭვირვალე დამცავი ფარით/ბარიერით
- მაგიდებს შორის დაშორება იქნება მინიმუმ 2 მეტრი, ერთმანეთის მიმდევრობით განლაგებულ მაგიდებს შორის მანძილი კი – 1 მეტრი
- პირბადის ტარება მთელი საგამოცდო პროცესის მანძილზე სავალდებულოა
- კონდიციონერები ჩაირთვება 30° გრადუსზე მაღალი ტემპერატურის პირობებში
- „ცენტრი წელსაც მოაწყობს სპეციალურ სივრცეებს იმ გამოსაცდელებისათვის, რომელთაც აღენიშნებათ მაღალი ტემპერატურა“, – აცხადებს გამოცდების ცენტრი.
წელს აბიტურიენტებისთვის ეროვნული გამოცდები 1-ელ ივლისს დაიწყება. 14 ივლისიდან მასწავლებლები და მასწავლებლობის მსურველები ჩააბარაბენ საგნობრივი კომპეტენციის დამადასტურებელ გამოცდას. 28 ივლისს კი ჩატარდება სტუდენტთა საგრანტო კონკურსი.
