Batumelebi | ქედაში ბიძაშვილის მკვლელობის საქმეზე საპროცესო გაფორმდა ქედაში ბიძაშვილის მკვლელობის საქმეზე საპროცესო გაფორმდა – Batumelebi
RU | GE  

ქედაში ბიძაშვილის მკვლელობის საქმეზე საპროცესო გაფორმდა

„ქედაში მომხდარი მკვლელობის საქმეზე“ ბრალდებულ გია ბერიძეს 13 წლით თავისუფლების აღკვეთა მიუსაჯეს. ეს პირველი საქმე იყო ბათუმის საქალაქო სასამართლოში, რომელსაც ნაფიცი მსაჯულები განიხილავდნენ, თუმცა არსებითი განხილვის მორიგ პროცესზე მხარეებს შორის საპროცესო შეთანხმება შედგა ანუ ბრალდებულმა ბრალი აღიარა და მასთან პროკურატურამ საპროცესო შეთანხმება გააფორმა.

საპროცესო შეთანხმების მიხედვით, გია ბერიძე 8 წელს საპატიმრო დაწესებულებაში გაატარებს, 5 წელი კი, პირობითი მსჯავრია. იმ შემთხვევაში, თუკი ნაფიცი მსაჯულები საქმის განხილვის დასრულების შემდეგ ბრალდებულს დამნაშავედ მიიჩნევდნენ, გია ბერიძეს 16-დან 20 წლამდე ან უვადოდ თავისუფლების აღკვეთა ელოდა.

საუბარია გასული წლის 2 ოქტომბერს ქედაში მომხდარ მკვლელობაზე – 32 წლის კაცი დანით მოკლეს. დაჭრილი საავადმყოფოში მიყვანისთანავე გარდაიცვალა. გარდაცვლილი კაცი ბრალდებულის ბიძაშვილი იყო.

მკვლელობის ამ საქმეზე ნაფიცი მსაჯულების სხდომებს მოსამართლე ვიოლეტა ფორჩხიძე უძღვებოდა. რადგანაც მხარეებს შორის საპროცესო შეთანხმება შედგა, მოსამართლემ მსაჯულები დაითხოვა და საპროცესო შეთანხმება დაადასტურა. გამამტყუნებელი განაჩენი მოსამართლე ვიოლეტა ფორჩხიძემ მიიღო.

ამ თემაზე:

ბიძაშვილი ჭორების გამო მოკლა – მოწმის ჩვენება სასამართლოში

 

 

ნეტგაზეთის მასალების სხვა გამოცემებში გადაბეჭდვის წესი
ავტორი