Batumelebi | შსს 400 ავტომანქანას – პიკაპსა და ჰეჩბეკს ყიდულობს, ტენდერი 39 მილიონი ლარით შსს 400 ავტომანქანას – პიკაპსა და ჰეჩბეკს ყიდულობს, ტენდერი 39 მილიონი ლარით – Batumelebi
RU | GE  

შსს 400 ავტომანქანას – პიკაპსა და ჰეჩბეკს ყიდულობს, ტენდერი 39 მილიონი ლარით

შესყიდვების სააგენტომ 100 ჰეჩბეკისა და 300 პიკაპის ტიპის ავტომანქანის შესაძენად ორი კონსოლიდირებული ტენდერი გამოაცხადა. შესყიდვის სავარაუდო ჯამური ღირებულება 39 923 734 ლარია. სააგენტოს ინფორმაციით, სპეციალიზებული მანქანები განკუთვნილია საქართველოს შინაგან საქმეთა სამინისტროსთვის.

სხვა მოთხოვნებთან ერთად, „ავტომობილები უნდა იყოს ახალი, არაუადრეს 2021 წლის გამოშვების, მარცხენასაჭიანი, ექსპლუატაციაში არმყოფი [გარბენი არაუმეტეს 200 კმ], ნივთობრივად და უფლებრივად უნაკლო და განბაჟებული. ამასთან, მიმწოდებელმა საკუთარი ხარჯებით უნდა უზრუნველყოს ავტომანქანების შემსყიდველზე გადაფორმება. შემოთავაზებული სატრანსპორტო საშუალებები უნდა იყოს თეთრი ფერის“, – აღნიშნულია პირობებში.

პირველი კონსოლიდირებული ტენდერი 100 ჰეჩბეკის ტიპის ავტომანქანის შეძენაზეა გამოცხადებული. წინადადებების მიღება 2021 წლის 8 ივნისს დაიწყება და 9 ივნისს დასრულდება.

შესყიდვის სავარაუდო ღირებულებაა 9 258 730 ლარი; დაფინანსება – 2022 წლის სახსრებით.

„ავტოსატრანსპორტო საშუალებების მიწოდება უნდა განხორციელდეს ეტაპობრივად, არანაკლებ 50 ერთეულის მიწოდება უნდა განხორციელდეს არაუგვიანეს 2021 წლის 31 ოქტომბრისა, ხოლო დანარჩენის – არაუგვიანეს 2022 წლის 31 იანვრისა.

მეორე ტენდერი 300 პიკაპის შესყიდვაზეა და აქაც წინადადებების მიღება 2021 წლის 8 ივნისს დაიწყება და 9 ივნისს დასრულდება. დაფინანსება 2022 წლის სახსრებით, შესყიდვის სავარაუდო ღირებულება კი – 30 665 004 ლარი.

შესყიდვის ობიექტს წარმოადგენს ოპერატიული დანიშნულების, სპეციალიზებული (პიკაპი) ტიპის 300 (სამასი) სატრანსპორტო საშუალება.

პიკაპების მიწოდება უნდა განხორციელდეს ეტაპობრივად, არანაკლებ 70 ერთეულის მიწოდება – არაუგვიანეს 2021 წლის 31 ოქტომბრისა, ხოლო დანარჩენის მიწოდება, არაუგვიანეს 2021 წლის 30 ნოემბრისა.

ორივე ტენდერში ანგარიშსწორება განხორციელდება შემდეგი გრაფიკით:

  • არანაკლებ 40%-ს ოდენობით 2022 წლის საბიუჯეტო ასიგნების ფარგლებში, არაუგვიანეს 2022 წლის 28 თებერვლისა
  • არანაკლებ 40%-ს ოდენობით 2023 წლის საბიუჯეტო ასიგნების ფარგლებში, არაუგვიანეს 2023 წლის 28 თებერვლისა
  • არანაკლებ 20%-ს ოდენობით 2024 წლის საბიუჯეტო ასიგნების ფარგლებში, არაუგვიანეს 2024 წლის 28 თებერვლისა

 

ამავე თემაზე:

სახელმწიფო 300 პიკაპს წელს ნისიად იყიდის

 

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com