აჭარის მთავრობის 2 სექტემბრის სხდომაზე გაკეთდა განცხადება, რომ ბათუმის ბულვარი, თავის ბიუჯეტიანად, სამართავად გადაეცემა მესაკუთრეს – ბათუმის მუნიციპალიტეტს.
აჭარის 2016 წლის რესპუბლიკურ ბიუჯეტში ბულვარისთვის – „ბათუმის ბულვარის ინფრასტრუქტურის მოვლა-შენახვისა და განვითარების ხელშეწყობისთვის“ – 10 მილიონ 368 ათას 500 ლარია გამოყოფილი, ხოლო ადმინისტრაციისთვის კიდევ 1 მილიონ ლარზე მეტი.
ამ თანხის ათვისება ბულვარის ადმინისტრაციას დაწყებული ჰქონდა. ტერიტორიაზე მიმდინარეობს ინფრასტრუქტურული პროექტების განხორციელება. შესაბამისად, კვლავ აქტუალური რჩება ძველ ბულვარში სამივე ხეივნის შენარჩუნების საკითხი, ვინაიდან ტენდერში გამარჯვებულ კომპანიასთან აუცილებელი იქნება მოლაპარაკების გამართვა და პროექტსა და ხელშეკრულებაში შესაბამისი ცვლილებების შეტანა [რასაც უპირობოდ ითხოვს „ბულვარის დამცველები“]. სავარაუდოდ, ამ მისიის შესრულება ბათუმის მუნიციპალიტეტს და ბულვარის ახალ ადმინისტრაციას მოუწევს.
„ბათუმელები“ ბათუმის მერიას დაუკავშირდა. მერიაში განაცხადეს, რომ ბულვარის გადმოცემასთან დაკავშირებით განცხადებას მოგვიანებით გააკეთებენ.
