Batumelebi | პედაგოგები, სტუდენტები – კიდევ ვინ იმგზავრებს უფასოდ საქალაქო ავტობუსებით პედაგოგები, სტუდენტები – კიდევ ვინ იმგზავრებს უფასოდ საქალაქო ავტობუსებით – Batumelebi
RU | GE  

პედაგოგები, სტუდენტები – კიდევ ვინ იმგზავრებს უფასოდ საქალაქო ავტობუსებით

ბათუმის მერიის მიერ საკრებულოში წარდგენილი პროექტით, ყველა ის პირი, ვინც ამ დრომდე საქალაქო ავტობუსებით შეღავათიან ფასად – 15 თეთრად მგზავრობდა, უფასოდ იმგზავრებს. ამასთან, უფასოდ მგზავრობის უფლება შეუნარჩუნდება ყველა იმ კატეგორიის მგზავრს, რომლებიც დღესაც უფასოდ მგზავრობენ [შშმ პირები, მოსწავლეები, 0-70 ათასი ქულის მქონე ბენეფიციარები და სხვ.].

მუნიციპალური ავტობუსებით მგზავრობის ფასი ბათუმში 30 თეთრია.

პენსიონერები, მასწავლებლები, სტუდენტები, სკოლის მანდატურები, ასევე საბავშვო ბაღებისა და ბიბლიოთეკების თანამშრომლები [რომელთა ხელფასი არ აღემატება 625 ლარს] – მუნიციპალური ავტობუსებით უფასოდ მას შემდეგ იმგზავრებენ, რაც საკრებულო ცვლილებებს დაამტკიცებს. საკითხი ბათუმის საკრებულოს 2021 წლის 31 მაისის სხდომის დღის წესრიგშია შეტანილი.

საკრებულოს მიერ დამტკიცებული ცვლილებების ძალაში შესვლის შემდეგ, ბათუმის მუნიციპალური ავტობუსებით უფასოდ მგზავრობას შეძლებენ:

  • ქალაქ ბათუმში არსებული საჯარო და კერძო სკოლების მასწავლებლები
  • საჯარო და კერძო სკოლების მასწავლებლები, რომლებიც რეგისტრირებულნი არიან ქალაქ ბათუმში;
  • ბათუმის მუნიციპალიტეტის ადმინისტრაციულ საზღვრებში არსებული ავტორიზებული უმაღლესი საგანმანათლებლო დაწესებულებების სტუდენტები;
  • ბათუმის მუნიციპალიტეტის ადმინისტრაციულ საზღვრებში არსებული პროფესიული საგანმანათლებლო პროგრამების განმახორციელებელი ავტორიზებული საგანმანათლებლო დაწესებულებების პროფესიული სტუდენტები;
  • ბათუმის მუნიციპალიტეტის ადმინისტრაციულ საზღვრებში რეგისტრირებული იძულებით გადაადგილებული პირები;
  • ბათუმის მუნიციპალიტეტის ადმინისტრაციულ საზღვრებში რეგისტრირებული „სახელმწიფო პენსიის შესახებ“ საქართველოს კანონით განსაზღვრული პენსიონერები;
  • ბათუმის მუნიციპალიტეტის ადმინისტრაციულ საზღვრებში არსებული საბავშვო ბაღებისა და ბიბლიოთეკების თანამშრომლები, რომელთა შრომის ანაზღაურება (სარგო) თვეში არ აღემატება 625 ლარს;
  • საბავშვო ბაღებისა და ბიბლიოთეკების თანამშრომლები, რომლებიც რეგისტრირებული არიან ქალაქ ბათუმის მუნიციპალიტეტში და რომელთა შრომის ანაზღაურება (სარგო) თვეში არ აღემატება 625 ლარს;
  • ბათუმის მუნიციპალიტეტის ადმინისტრაციულ საზღვრებში განლაგებულ ზოგადსაგანმანათლებლო დაწესებულებებში მომუშავე მანდატურები;
  • ქალაქ ბათუმის მუნიციპალიტეტში რეგისტრირებული მარტოხელა მშობლის სტატუსის მქონე პირები.

„2021 წლის ბიუჯეტით გათვალისწინებული „მუნიციპალური ტრანსპორტით მგზავრობის საფასურის სუბსიდირება“ ქვეპროგრამის შესაბამისად, ყველა ზემოაღნიშნული ბენეფიციარი [სულ 31 771 პირი] ისარგებლებს უფასო ტარიფით“ [ცვლილების ძალაში შესვლის შემდეგ] – აღნიშნულია მერიის დოკუმენტში.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com