Batumelebi | 30 დღეში საქართველოში 18 287 ადამიანი აიცრა კოვიდზე 30 დღეში საქართველოში 18 287 ადამიანი აიცრა კოვიდზე – Batumelebi
RU | GE  

30 დღეში საქართველოში 18 287 ადამიანი აიცრა კოვიდზე

დაავადებათა კონტროლის ეროვნული ცენტრის ცნობით, 10 აპრილის მდგომარეობით საქართველოში 18 287 ადამიანი აიცრა კოვიდზე.

საქართველოში კორონავირუსზე ვაქცინაცია 15 მარტს დაიწყო „ასტრაზენეკას“ ვაქცინით, შესაბამისად, 18 287 ადამიანი 30 დღის განმავლობაში აიცრა. თუ ვაქცინაცია ამ ტემპით გაგრძელდება, ერთი წლის განმავლობაში საქართველოში მხოლოდ 220 ათასამდე ადამიანი აიცრება კოვიდზე.

თავდაპირველად ვაქცინაცია მხოლოდ მედმუშაკებისთვის იყო გათვალისწინებული, თუმცა თანდათან ვაქცინაციის მიმღებთა წრე გაფართოვდა და 10 აპრილის მდგომარეობით კორონავირუსზე აცრა შეუძლიათ  55 წელს ზემოთ მოქალაქეებს, დიალიზის საჭიროების მქონე და ორგანოგადანერგილი პირებსაც.

ამჟამად კორონავირუსზე ვაქცინაცია საქართველოში „ასტრაზენეკას“ და „ფაიზერის“ ვაქცინებით მიმდინარეობს.

საქართველომ 3 აპრილს ასევე მიიღო ჩინური „სინოფარმის“ 100 000 დოზა, რაც დაახლოებით 50 ათასი ადამიანისთვისაა სამყოფი, თუმცა ამ ვაქცინას ჯანდაცვის მსოფლიო ორგანიზაციის ავტორიზაცია არ აქვს.

ჯანდაცვის მინისტრის, ეკატერინე ტიკარაძის განცხადებით, შეიქმნება პორტალი, სადაც საქართველოს ყველა მოქალაქე შეძლებს წინასწარ დააფიქსიროს ვაქცინაციის სურვილი და აირჩიოს, თუ რომელი კომპანიის პრეპარატით სურს იმუნიზაცია.

მინისტრის თქმით, აღნიშნული ინფორმაცია დაეხმარება სახელმწიფოს, მიიღოს სტრატეგიული გადაწყვეტილებები, მათ შორის, თუ რომელი ვაქცინა უნდა შემოიტანონ ქვეყანაში შემდეგ ეტაპზე.

საქართველოში ვაქცინაციის პროცესის შენელებაზე მნიშვნელოვანი გავლენა იქონია ექთანი მეგი ბაქრაძის გარდაცვალებამ „ასტრაზენეკას“ ვაქცინის მიღების შემდეგ, თუმცა ამ დრომდე არ არსებობს ოფიციალური სამედიცინო დასკვნა იმის შესახებ, განუვითარდა თუ არა გარდაცვლილ ექთანს ანაფილაქსიური შოკი და უკავშირდებოდა თუ არა ეს ვაქცინას. ამ საქმეზე პროკურატურამ გამოძიებისთვის ცრუ ინფორმაციის მიწოდებისთვის ორ ექიმსა და ერთ ექთანს წარუდგინა ბრალი.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com