4-დან 11 მაისამდე საქართველოში უქმე დღეები იქნება – გადაწყვეტილება ამის შესახებ 9 აპრილს მიიღო მთავრობასთან არსებულმა საკოორდინაციო საბჭომ.
ბოლო კვირებში კორონავირუსის შემთხვევების მატებასთან დაკავშირებით, მთავრობა რეკომენდაციას აძლევს დამსაქმებლებს, თანამშრომლები დისტანციური მუშაობის რეჟიმში გადაიყვანოს. გადაწყვეტილება თავად დამსაქმებლებმა უნდა მიიღონ.
კვლავ ძალაში რჩება ღამის 9 საათიდან დილის 5 საათამდე გადაადგილების შეზღუდვა.
შაბათ-კვირას კვების ობიექტები ისევ არ იმუშავებენ.
საკოორდინაციო საბჭო მოქალაქეებს კიდევ ერთხელ მოუწოდებს, სწორად გამოიყენონ პირბადე, დაიცვან სოციალური დისტანცია და თავი აარიდონ ხალხმრავალი შეკრებებისა და სოციალური ღონისძიებების ორგანიზებას, რომელთა გამართვა მთავრობის დადგენილებით აკრძალულია.
„არ მომხდარა შეზღუდვების გამკაცრების და ე.წ. ლოკდაუნის განხილვა“ – აცხადებს მთავრობა.
ბოლო მონაცემებით, საქართველოში დადებითობის მაჩვენებელი ბოლო 14 დღის მანძილზე 2.16 პროცენტია, ხოლო 7 დღის მანძილზე კი – 2.49 %.
საქართველოში კორონავირუსის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობაა 287 689. პანდემიის გავრცელებიდან დღემდე ვირუსს ჯამში 3 869 პირი ემსხვერპლა.
______________
ფოტო „ბათუმელების“ 2020 წლის არქივიდან.
