ბათუმში დააკავეს აქტივისტები, რომლებიც მოძრაობა “სირცხვილიას” ოფისში კომენდანტის საათს აპროტესტებდნენ.
აქტივისტების ინფორმაციით, დაკავებულია მინიმუმ სამი ადამიანი. შემთხვევა დღეს, 4 აპრილს მოხდა. აქტივისტები ამბობენ, რომ დაკავების დროს არეულობა იყო. მათ დაინახეს სამი ადამიანის დაკავება, მაგრამ არ გამორიცხავენ, რომ მეტი პირი იყოს დაკავებული.
დაკავებულთა შორისაა ოპოზიციური პარტიის წარმომადგენელი გენრი დოლიძე.
აქტივისტები “სირცხვილიას” ოფისში კომენდანტის საათის არსებობას აპროტესტებდნენ და დაგეგმილი ჰქონდათ დილის ხუთ საათამდე გაეგრძელებინათ საპროტესტო წვეულება.
„ადმინისტრაციული წესით არიან დაკავებულები, დანარჩენზე ვიმსჯელებთ სასამართლოში,“ – ეს ერთ-ერთი სამართალდამცავის განმარტებაა „სირცხვილიას“ აქტივისტების კითხვაზე, თუ რატომ დააკავეს საპროტესტო ღონისძიების მონაწილეები.
“ბათუმელები” ცდილობს შინაგან საქმეთა სამინისტროსთან დაკავშირებას, დაკავებულთა ვინაობისა და რაოდენობის შესახებ ინფორმაციის დაზუსტებას.
ამავე თემაზე:
Batumelebi | კომენდანტის საათის დარღვევა და სტიკეტები „ოცნების“ ბათუმის ოფისზე – Live (netgazeti.ge)
