დაავადებათა ეროვნული კონტროლის ცენტრის გადამდებ დაავადებათა დეპარტამენტის უფროსი, ხათუნა ზახაშვილი ამბობს, რომ არც ერთ ვაქცინაზე, რომლებიც გამოიყენება კოვიდის საწინააღმდეგოდ, არ არის ჩატარებული კვლევები ორსულებში მათი გამოყენების შესახებ.
„თუმცა არის ცდები ჩატარებული ცხოველებზე და აჩვენებს, რომ რაიმე ტერატოგენული ეფექტი არც ერთ საცდელ ვაქცინას არ გამოუვლენია და რისკებს ცხოველთა პოპულაციაში არ მოიცავს. თუმცა ადამიანებში ასეთი ცდები ჩატარებული არ არის. შესაბამისად, ორსული ადამიანების აცრაზე პირდაპირი რეკომენდაცია არ არსებობს“, – აცხადებს ხათუნა ზახაშვილი.
მისი თქმით, „თუ მაინც აიცრება ქალი, როცა ჯერ კიდევ არ არის იდენტიფიცირებული ორსულობა, ეს არ წარმოადგენს ორსულობის შეწყვეტის ჩვენებას“.
ხათუნა ზახაშვილმა ისაუბრა ონკოლოგიური დაავადებების მქონე პაციენტებზეც. „რაც შეეხება ონკოლოგიური დაავადების მქონე ადამიანებს, ეს ადამიანები ითვლებიან იმ კატეგორიად, რომლებსაც აქვთ კოვიდის მიმდინარეობის ძალიან მძიმე რისკი, ამიტომ თავიანთ ექიმებთან შეთანხმებით უნდა მოხდეს ამ პირების დროული ვაქცინაცია, რომ შესაძლო გვერდითი მოვლენების მართვა მოხდება სრულფასოვნად“, – ამბობს ხათუნა ზახაშვილი.
___
დღევანდელი მონაცემებით, საქართველოში კოვიდზე ამ დროისთვის სულ 8 536 ადამიანი აიცრა.
