Batumelebi | რას ამბობს რესან კონცელიძე გახარიას გუნდში გადასვლაზე რას ამბობს რესან კონცელიძე გახარიას გუნდში გადასვლაზე – Batumelebi
RU | GE  

რას ამბობს რესან კონცელიძე გახარიას გუნდში გადასვლაზე

ბათუმის მაჟორიტარი დეპუტატი საქართველოს პარლამენტში „ოცნებიდან“ რესან კონცელიძე ეხმაურება გავრცელებულ ინფორმაციას, რომ ის შესაძლოა ყოფილი პრემიერის, გახარიას გუნდში ვიხილოთ.  რესან კონცელიძე აცხადებს, რომ გახარიას გუნდში გადასვლას არ გეგმავს.

„მე არავითარი შემოთავაზება არ მქონია. მე ვარ ბათუმის მაჟორიტარი დეპუტატი. ამირჩიეს ბათუმელებმა „ქართული ოცნებიდან“. მე მაქვს აღებული ვალდებულებები და მე ერთგული ვრჩები ამ ვალდებულებების. გავაგრძელებ მუშაობას „ქართული ოცნების გუნდში“, – განაცხადა რესან კონცელიძემ.

რესან კონცელიძემ ასევე განაცხადა, რომ მისთვის ამ განცხადების გაკეთება პარტიას არ დაუვალებია.

რესან კონცელიძე „ოცნების“ მაჟორიტარ კანდიდატად გახარიას რეკომენდაციით დაასახელეს.

ყოფილმა პრემიერ-მინისტრმა გიორგი გახარიამ დღეს განაცხადა, რომ პოლიტიკიდან წასვლას არ აპირებს. ამის შესახებ მან ჟურნალისტებს უთხრა. ეს გადადგომის შემდეგ გახარიას პირველი კომენტარია.

მისი თქმით, ის სამომავლო გეგმებზე უახლოეს პერიოდში დეტალურად ისაუბრებს.

„რაც შეეხება მომავალს, მიუხედავად იმისა, რომ უამრავი სხვადასხვა ჭორი დადიოდა, არსად წასვლას არ ვაპირებ. უფრო მეტიც, არც პოლიტიკად არ წავალ. რეალურად გეგმებს მივყვებით, ჩვენს დღის წესრიგს, რაც მოგვცემს იმის საშუალებას, რომ უახლოეს პერიოდში ყველაფერი დეტალურად გაგიზიაროთ, მოგიყვეთ. ეს არის დღეს რისი თქმაც მინდოდა და დროებით, მალე შევხვდებით ისევ“, — განაცხადა გახარიამ.

კითხვაზე, შესაძლოა თუ არა, რომ მას მთავრობაში ყოფნის პერიოდში ფარულად უსმენდნენ, გახარია პასუხობს, რომ ამას გამორიცხავს.

„გამოვრიცხავ. მოდით, ასე შევთანხმდეთ, ყველა კითხვას, როგორც ყოველთვის წარსულში, პასუხები გაეცემა“, – განაცხადა გახარიამ.

ნეტგაზეთის მასალების სხვა გამოცემებში გადაბეჭდვის წესი
ავტორი