Batumelebi | „მოგვეცით მუშაობის საშუალება“ – ბათუმში სარიტუალო დარბაზებში დასაქმებულები აქციას მართავენ „მოგვეცით მუშაობის საშუალება“ – ბათუმში სარიტუალო დარბაზებში დასაქმებულები აქციას მართავენ – Batumelebi
RU | GE  

„მოგვეცით მუშაობის საშუალება“ – ბათუმში სარიტუალო დარბაზებში დასაქმებულები აქციას მართავენ

დღეს, 16 მარტს, ბათუმში, მთავრობის სახლთან სარიტუალო დარბაზებში დასაქმებული პირები აქციას მართავენ. მათი განცხადებით, მათ უკვე აღარ შეუძლიათ გაუმკლავდნენ ეკონომიკურ კრიზისს, რაც კორონავირუსის პანდემიის გამო დაწესებულ შეზღუდვითაა გამოწვეული.

უკვე თვეებია საქართველოში არ მუშაობენ სარიტუალო დარბაზები, კოვიდის გამო აკრძალულია ქორწილები, ქელეხები და ხალხმრავალი ღონისძიებები. დაწესებული შეზღუდვები საქართველოში ეტაპობრივად იხსნება, თუმცა ამ დრომდე შეზღუდვების შემსუბუქება არ ეხება სარიტუალო დარბაზებს.

„ჩვენ უკან არიან ოჯახები, რომელთაც შემოსავალი არ აქვთ, გვყავს თანამშრომლები, რომლებიც ერთადერთი შემომტანები იყვნენ ოჯახში და ისინი თვეებია შემოსავლის გარეშე არიან დარჩენილი. გვინდა ჩვენი ხმა მივაწვდინოთ მთავრობას, მოგვცენ მუშაობის საშუალება რეგულაციების დაცვით, თორემ ისედაც რთულ მდგომარეობაში მყოფნი, კიდევ უფრო გავღატაკდებით. ყველა რეგულაციის დაცვაზე თანახმა ვართ“ – აცხადებენ აქციაზე.

„უკვე დავალომბარდე ყველაფერი, რისი დალომბარდებაც შეიძლებოდა. როგორ უნდა ვიცხოვროთ, არ ვიცით“ – გვითხრა აქციის ერთ-ერთმა მონაწილემ.

ერთი სარიტუალო დარბაზი ათობით ადამიანს ასაქმებს. ეს არიან მუსიკოსები, მზარეულები, მიმტანები, დამლაგებლები და ა.შ.

აქციის მონაწილეები აჭარის მთავრობასთან შეხვედრას ითხოვენ.

ნეტგაზეთის მასალების სხვა გამოცემებში გადაბეჭდვის წესი
ავტორი