Batumelebi | „არაფერს გამოვრიცხავ“ – სალაძე TV პირველში პროკურატურის „პროპორციული ძალის“ გამოყენებაზე „არაფერს გამოვრიცხავ“ – სალაძე TV პირველში პროკურატურის „პროპორციული ძალის“ გამოყენებაზე – Batumelebi
RU | GE  

„არაფერს გამოვრიცხავ“ – სალაძე TV პირველში პროკურატურის „პროპორციული ძალის“ გამოყენებაზე

„ეს არის ცუდი და უკანონო გადაწყვეტილება, არაპირდაპირ სურთ წყაროს გაგება,“ – მიიჩნევს იურისტი, საია-ს ყოფილი ხელმძღვანელი, სულხან სალაძე მოსამართლე ლაშა კლდიაშვილის მიერ დღეს, 11 მარტს გამოტანილი განჩინების შესახებ. განჩინების მიხედვით, პროკურატურას შეუძლია TV პირველიდან ამოიღოს „ელექტრონული ინფორმაციის მატარებელი მოწყობილობა, რომელზეც ჩაწერილი იყო რეპორტაჟში გამოყენებული კერძო საკუთრების ამსახველი ჩანაწერები“.

„პროკურატურა ითხოვს ყველაფერს, რაც ამ ჩანაწერებთან არის დაკავშირებული და არა მხოლოდ იმ ჩანაწერს, რაც ეთერში გავიდა. ეს არის პრაქტიკულად არაპირდაპირი გზა წყაროს დასახელებისკენ. როგორც ცნობილია, წყაროს დასახელების ვალდებულება არ არსებობს,“ – ამბობს სულხან სალაძე.

საია-ს ყოფილ ხელმძღვანელს მიაჩნია, რომ მთავარი საფრთხე ახლა არის არამხოლოდ ის, რომ პრეცედენტი შეიქმნება, როცა მედიას აიძულებენ წყაროს დასახელებას, არამედ ეს თვითცენზურას შეუწყობს ხელს და ადამიანები ამა თუ იმ დანაშაულის შესახებ ჟურნალისტებს აღარაფერს ეტყვიან.

განჩინების მიხედვით, „საგამოძიებო მოქმედების ჩამტარებელ პირს ან ორგანოს უფლება აქვს, წინააღმდეგობის გაწევისას გამოიყენოს იძულების პროპორციული ძალა“.

რას გულისხმობს „პროპორციული ძალის“ გამოყენება, როდესაც ცნობილია, რომ TV პირველი წყაროს დასახელებას არ აპირებს?

„პროცესები იმდენად შორსაა წასული, არაფერს გამოვრიცხავ, მათ შორის, ტელევიზიის საქმიანობის პარალიზებას ან ხელშეშლას, მაგალითად, ამოიღონ კომპიუტერები და ასე შემდეგ… იტყვიან, რომ აი, წინააღმდეგობა გამიწიეს, როცა საგამოძიებო მოქმედებების განხორციელება მსურდაო. ცალკე შეფასების კატეგორიაა, რა შეიძლება იყოს ეს პროპორციული ძალა, ამ კუთხით განჩინება არ არის დეტალური და ის ინტერპრეტაციის შესაძლებლობას იძლევა,“ – მიიჩნევს სულხან სალაძე.

იურისტი ამ პროცესის პრობლემად მიიჩნევს იმასაც, რომ პროკურატურამ უკვე იცის, რა არ უნდა გამოიძიოს. სულხან სალაძის დაკვირვებით, ამ საქმიდან პირდაპირ ჩანს, როგორ მოქმედებს პროკურატურა ხელისუფლების მითითების შესაბამისად.

„გამოძიება უნდა დაწყებულიყო ჩანაწერის ეთერში გასვლის მომენტიდან, გნებავთ, ანონსის გასვლის მომენტიდან და არა ორი-სამი დღის შემდეგ, როცა ყველამ ყველაფერი თქვა, როცა მმართველმა პარტიამ თქვა, რა არის გამოსაძიებელი და შემდეგ იგივე გადაამღერა პროკურატურამ. ჩვენ გამოძიებამ უნდა გვითხრას, რა მოხდა და არა ხელისუფლების წარმომადგენელმა… ერთია, რა ვითარებაში გაკეთდა ეს ჩანაწერი, როდის და რა გარემოებაში, რაზეც გამოძიება დაიწყო, მაგრამ თუ ამ ჩანაწერში დანაშაულის ნიშნები იკვეთება, ჩვენ მმართველმა პარტიამ არ უნდა გვითხრას, რა მოხდა სინამდვილეში, ან რა თქვა ამის შესახებ პრემიერმა შეხვედრაზე. ამ შემთხვევაში ხელისუფლებამ უთხრა მთავარი მესიჯი პროკურატურას, რა არ უნდა გამოიძიოს,“ – გვითხრა სულხან სალაძემ.

___

„ტვ პირველმა“ რამდენიმე დღის წინ გაავრცელა აუდიოჩანაწერები, რომლებშიც ამჟამინდელი პრემიერ-მინისტრი ირაკლი ღარიბაშვილი, ბიძინა ივანიშვილის ვაჟი ბერა ივანიშვილი და სახელმწიფო დაცვის სპეციალური სამსახურის ასევე ამჟამინდელი უფროსი ანზორ ჩუბინიძე ერთმანეთთან ათანხმებენ, როგორ უნდა დაისაჯონ სოციალურ ქსელებში ბერა ივანიშვილის მისამართით დაწერილი უარყოფითი კომენტარების ავტორები.

ამ სამ მოქმედ პირს შორის ორმა – ანზორ ჩუბინიძემ და ბერა ივანიშვილმა ჩანაწერებზე საჯაროდ ისაუბრეს. ორივე მათგანმა ჩანაწერის შინაარსის ნაწილი დაადასტურა, თუმცა, თქვეს, რომ ეს რამდენიმე წლის წინ მოხდა და ჩანაწერები კონტექსტიდან ამოგლეჯილად გავრცელდა.

ნეტგაზეთის მასალების სხვა გამოცემებში გადაბეჭდვის წესი
ავტორი