შპს „ბათუმის წყლის“ ადმინისტრაციის ინფორმაციით, ავარიული დაზიანების გამო, ხვალ, 20 თებერვლის დილის 08:00 საათამდე, წყალმომარაგება შეუწყდა ლერმონტოვის ქუჩის, გრიბოედოვიდან ლუკა ასათიანის ქუჩამდე მონაკვეთში, ნინოშვილისა და ჭავჭავაძის ქუჩების აბონენტებს.
ამ წუთებში აბონენტებს წყალი არ მიეწოდებათ ასევე მემედ აბაშიძის ქუჩაზე.
რამდენიმე წუთის წინ ბათუმში, ჭავჭავაძის და ლერმონტოვის ქუჩების კვეთაში, წყალმა ამოხეთქა. ამ დროისთვის უცნობია დაზიანების მიზეზი, ადგილზე იმყოფებიან „ბათუმის წყლის“ წარმომადგენლები, ადგილზე მივიდა კომპანიის ახალი დირექტორი ლევან დავითაძეც.
კომპანიის ინფორმაციით, წყალმომარაგების მიწოდების აღდგენის შემდეგ, შესაძლოა, წყალი იყოს მცირედით ამღვრეული, რაც გამოწვეულია მილზე არსებული ჯანმრთელობისათვის უსაფრთხო მინერალების ჩამორეცხვით.
„ბათუმის წყალი“ მოუწოდებს აღნიშნულ ქუჩებზე მცხოვრებ მოსახლეობას, წყლის მიწოდების აღდენის შემდეგ, ონკანი გააღონ და რამდენიმე წუთის განმავლობაში ჰქონდეთ ღია მდგომარეობაში.
