Batumelebi | „ამაზრზენია ის, რაც ბათუმში მოხდა“ – ენმ-ს ლიდერები დეპუტატზე თავდასხმას ეხმაურებიან „ამაზრზენია ის, რაც ბათუმში მოხდა“ – ენმ-ს ლიდერები დეპუტატზე თავდასხმას ეხმაურებიან – Batumelebi
RU | GE  

„ამაზრზენია ის, რაც ბათუმში მოხდა“ – ენმ-ს ლიდერები დეპუტატზე თავდასხმას ეხმაურებიან

„ამაზრზენია ის, რაც ბათუმში მოხდა, ერთნაირად სამარცხვინო ხალხია ის, ვინც ნაგავს აყრის ადამიანს და ისიც, ვინც ამას მიესალმება“, – წერს ფეისბუქზე სალომე სამადაშვილი, „ნაციონალური მოძრაობის“ ერთ-ერთი ლიდერი.

ფაქტს ამავე პარტიიდან ფეისბუქზე გამოეხმაურა რომან გოცირიძეც, რომელიც წერს: „რაც ბათუმში მოხდა, არის სამარცხვინო საქციელი. ძალადობა განსხვავებული პოლიტიკური შეხედულების, თუნდაც არასწორი გადაწყვეტილების გამო, რაგინდ მიუღებელიც არ უნდა იყოს იგი, არის ბოლშევიზმი“.

დღეს, 23 იანვარს, ბათუმის ბულვარში გამართულ აქციაზე მივიდა უმაღლესი საბჭოს დეპუტატი ირაკლი ჩავლეიშვილი, სადაც მას ორგანიზაცია „ალტერნატივას“ აქტივისტები დაუპირისპირდნენ. მოგვიანებით, ბულვარიდან ევროპის მოედნამდე გაჰყვნენ მას და ნაგავი გადააყარეს თავზე. ჩავლეიშვილი ამბობს, რომ ის პოლიციაში ჩივილს არ აპირებს, თუმცა ამბობს, რომ ფაქტზე შესაბამის უწყებებს უნდა ჰქონდეთ რეაგირება.

ბათუმის ბულვარის დასაცავად გამოსული აქტივისტები ემიჯნებიან მომხდარს და აცხადებენ, რომ „ალტერნატივას“ ქმედებებთან მათ საერთო არ აქვთ. ამის თაობაზე განცხადება გაავრცელა საზოგადოება „ბათომმაც“.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com