2021 წლის პირველ იანვარს და არც შემდეგ დღეებში პიროტექნიკის აფეთქების შედეგად წელს არც ერთი ბავშვი და არც ზრდასრული ადამიანი აჭარაში არ დაშავებულა. ამის შესახებ ინფორმაცია „ბათუმელებს“ სასწრაფო სამედიცინო სამსახურში დაუდასტურეს.
დანარჩენ საქართველოში პიროტექნიკით დაზიანების ფაქტი, ისე როგორც გასულ წლებში, წელსაც დაფიქსირდა. სასწრაფო სამედიცინო სამსახურის ინფორმაციით, 2020 წლის 31 დეკემბერსა და 2021 წლის 1 იანვარს, საქართველოს მასშტაბით, პიროტექნიკით დაზიანდა 51 პირი. მათ შორის 36 ადამიანი თბილისში, ხოლო 15 ქვეყნის რეგიონებში.
სამედიცინო დაწესებულებაში მოთავსება დასჭირდა 36 დაშავებულს.
2019 წლის 31 დეკემბრიდან 2020 წლის პირველი იანვრის ჩათვლით საქართველოში პიროტექნიკით 81 ადამიანი დაზიანდა, მათგან 51 პირს ჰოსპიტალიზაცია დასჭირდა.
მიუხედავად იმისა, რომ არასრულწლოვანისთვის პიროტექნიკური ნაწარმის მიყიდვა საქართველოში 2018 წლიდან დასჯადია, პიროტექნიკა, ე.წ. „ასაფეთქებლები“ და „ბომბაჩკები“ ბავშვებისთვის რომ კვლავ ხელმისაწვდომია, ამაში ქუჩაში გავლისასაც იოლად დარწმუნდებით.
