24 დეკემბერს აჭარის უმაღლეს საბჭოში კენჭი უყარეს 2016 წლის აჭარის რესპუბლიკური ბიუჯეტის პროექტს. ახალი ბიუჯეტი არ დამტკიცდა, რადგან ექვსმა დეპუტატმა ხმა არ მისცა, სამმა თავი შეიკავა, ერთი, „თავისუფალი დემოკრატების“ წევრი, სულხან ღლონტი კი სხდომას არ ესწრებოდა.
ბიუჯეტის პროექტს მხარი არ დაუჭირეს „ნაციონალური მოძრაობის“ და „თავისუფალი დემოკრატების“ წევრებმა. ასევე, ერთმა დამოუკიდებელმა დეპუტატმა მედეა ვასაძემ.
„თავისუფალი დემოკრატების“ წევრი უმაღლეს საბჭოში თემურ კახიძე, „ბათუმელებთან“ საუბარში აცხადებს, რომ 2016 წლის აჭარის ბიუჯეტის პროექტი არარეალურია:
„ჩვენ ვერ ვხედავთ სწორად გაწერილ პრიორიტეტებს, გრძელ და მოკლევადიან გეგმებს, რისგანაც უნდა შედგებოდეს რეალურად ბიუჯეტი. ეს ბიუჯეტი მოკლებულია რეალობას და ხელოვნურად არის გაზრდილი, რადგან საარჩევნო წელია.“
აჭარის ფინანსთა და ეკონომიკის მინისტრი დავით ბალაძე აცხადებს, რომ დეპუტატებმა ბიუჯეტის პროექტი პირადი ინტერესების გამო ჩააგდეს:
„ისინი ცდილობენ რეგიონში პოლიტიკური კრიზისი შექმნან და ეს გააკეთეს პირადი ინტერესებით. მე არ ვარ პირდაპირი ეთერის მოყვარული, მაგრამ დღეს ვგრძნობ პასუხისმგებლობას მოსახლეობასთან და მინდა საზოგადოებას ავუხსნა ის მიმართულებები, რაც გათვალისწინებული იყო 2016 წლის ბიუჯეტში და რა სარგებელი უნდა მოეტანა ამას ხალხისთვის“-განაცხადა დავით ბალაძემ ჟურნალისტებთან.
მისი თქმით, „როცა 50 მილიონით გაზრდილ ბიუჯეტს დეპუატია მხარს არ უჭერს, ეს იმას ნიშნავს, რომ რეგიონში კრიზისის შექმნა უნდა“.
