ბათუმში დღეიდან, 15 დეკემბრიდან, რამდენიმე ქუჩაზე მოძრაობის წესები შეიცვალა. გარკვეულ მონაკვეთებში მოძრაობის წესებს საპატრულო პოლიცია არეგულირებს.
კონკრეტულად:
გორგილაძის ქუჩაზე ტრანსპორტი ვეღარ შემოვა ჯავახიშვილის ქუჩიდან ბარათაშვილის ქუჩის მიმართულებით. ამ მონაკვეთში/ზოლში მხოლოდ მუნიციპალური ავტობუსები და ველოსიპედები იმოძრავებენ.
გორგილაძის ქუჩა, ბათუმი / ჯავახიშვილის ქუჩიდან ბარათაშვილის ქუჩამდე გორგილაძის ქუჩის ამ [მარჯვენა] ზოლში სხვა ტრანსპორტი, გარდა მუნიციპალური ავტობუსებისა, ვეღარ იმოძრავებს
ჭავჭავაძის ქუჩაზე ტრანსპორტი ვერ შემოვა გრიბოედოვის ქუჩიდან ვაჟა-ფშაველას ქუჩის მიმართულებით. ჭავჭავაძის ქუჩის ამ მონაკვეთში [გრიბოედოვიდან ვაჟა-ფშაველას კვეთამდე] მხოლოდ მუნიციპალური ავტობუსები და ველოსიპედები იმოძრავებენ.
პუშკინის ქუჩაზე ცალმხრივი იქნება მოძრაობა ლორიას ქუჩიდან ვაჟა-ფშაველას ქუჩის კვეთამდე [ანუ, პირიქით – ვაჟა-ფშაველას კვეთიდან ლორიას ქუჩის მიმართულებით ავტოტრანსპორტი ვერ იმოძრავებს].
ქუჩის იმ მონაკვეთებში, სადაც მხოლოდ მუნიციპალური ავტობუსები იმოძრავებენ, ავტობუსებისთვის განკუთვნილ ზოლში [ტროტუარების გასწვრივ] აიკრძალა ავტოპარკინგიც.
ბათუმში პანდემიის გამო დაწესებული შეზღუდვების გამო მუნიციპალური ავტობუსები არ მუშაობს. მუნიციპალური ტრანსპორტის მოძრაობა 24 დეკემბერს დროებით უნდა აღდგეს.
ახალი სქემის დეტალები ნახეთ ამ ბმულზე:
მოგწონთ თუ არა ბათუმში ტრანსპორტის მოძრაობის ახალი სქემა? [გამოკითხვა]
