მდიდარმა ქვეყნებმა იყიდეს კორონავირუსის ვაქცინის იმ რაოდენობის დოზა, რომ შეუძლიათ საკუთარი მოსახლეობა სამჯერ აცრან – აცხადებს „სახალხო ვაქცინების ალიანსი“, რომელიც ვაქცინების თანაბრად გადანაწილების ზედამხედველობის საერთაშორისო ორგანიზაციაა და წარმოადგენს ისეთი ორგანიზაციების კოალიციას, როგორიცაა: Oxfam, Amnesty International, UNAIDS და სხვ.
67 ღარიბ ქვეყანაში ყოველი 10 ადამიანიდან ერთს აქვს იმედი, რომ მიიღებს ვაქცინას მომავალი წლის ბოლოსთვის – „სახალხო ვაქცინების ალიანსის” ამ განცხადების შესახებ წერს CNN-ი.
ამავდროულად, განვითარებულ სამყაროში, სადაც პანდემიის პირველი კვირებისა და თვეების განმავლობაში დაიწყეს ზრუნვა ვაქცინის მარაგების უზრუნველყოფაზე, მოხდა ჭარბი შეკვეთა; ერები, რომლებიც მსოფლიოს მოსახლეობის მხოლოდ 14% -ს წარმოადგენენ, ფლობენ ყველაზე პერსპექტიული ვაქცინების მარაგის ნახევარზე მეტს.
UNAIDS: მდიდარმა ქვეყნებმა, რომლებიც წარმოადგენენ მსოფლიოს მოსახლეობის მხოლოდ 14% -ს, იყიდეს ყველაზე პერსპექტიული ვაქცინების 53%.
ალიანსმა მოუწოდა ფარმაცევტულ კომპანიებს, თავიანთი ტექნოლოგია და ინტელექტუალური საკუთრება გაუზიარონ მსოფლიო ჯანდაცვის ორგანიზაციას და მოუწოდა მთავრობებს, ხელი შეუწყონ ვაქცინების მიწოდებას განვითარებადი ქვეყნებისთვის, რათა დასრულდეს ეკონომიკური უთანასწორობა ერებს შორის, რომლებიც ცდილობენ გაუმკლავდნენ კოვიდ19-ის დამანგრეველ კრიზისს.
„არავის უნდა დაებლოკოს სასიცოცხლოდ მნიშვნელოვანი ვაქცინის მიღება იმის გამო, რომ კონკრეტულ ქვეყანაში ცხოვრობს ან ჯიბეში არსებული ფულის რაოდენობის გამო“, – თქვა ანა მარიოტმა, საქველმოქმედო ორგანიზაცია Oxfam-ის ჯანდაცვის პოლიტიკის მენეჯერმა.
„მაგრამ, თუ რამე მკვეთრად არ შეიცვლება, მილიარდობით ადამიანი მთელ მსოფლიოში ვერ მიიღებს Covid19-ის საწინააღმდეგო უსაფრთხო და ეფექტურ ვაქცინას წლების განმავლობაში,“ – დასძინა მან.
სამშაბათს, 8 დეკემბერს, გაერთიანებული სამეფო გახდა პირველი ქვეყანა, რომელმაც დაიწყო მოქალაქეების კორონავირუსის ავტორიზებული ვაქცინით.
Pfizer / BioNTech ვაქცინის დოზების 96% იყიდეს მდიდარმა ქვეყნებმა – განაცხადა „სახალხო ვაქცინის ალიანსმა“; ანალოგიურად, „მოდერნას“ ვაქცინის ყველა დოზა ასევე შეიძინეს მდიდარმა ქვეყნებმა.
ალიანსის განცხადებით, მაგალითად, კანადამ ვაქცინის იმდენი დოზა შეიძინა, რომ თუ ყველა წამყვანი ვაქცინა დამტკიცდება, კანადა შეძლებს მისი ყველა მოქალაქე ხუთჯერ აცრას.
ალიანსმა დაადგინა 67 ქვეყანა, რომელთაც ყველაზე მაღალი რისკი აქვთ პანდემიისგან თავის დაღწევის ბრძოლას გამოეთიშონ. მათგან ხუთში – კენიაში, მიანმარში, ნიგერიაში, პაკისტანსა და უკრაინაში დაფიქსირებულია ჯამში 1.5 მილიონზე მეტი შემთხვევა.
სულ ცოტა 172 ქვეყანა განიხილავს ჯანმო-ს ორგანიზებით შექმნილ ინიციატივაში, „კოვაქსში” ჩართვას, რომლის მიზანიც არის უზრუნველყოს კოვიდ19-ის ვაქცინაზე წვდომა მსოფლიო მასშტაბით.
თუმცა ჯანმო-ის ორგანიზებით შექმნილი ინიციატივის, COVAX-ის სქემის ქვეშ მხოლოდ 250 მილიონი დოზის შეძენაა დადასტურებული.
