შინაგან საქმეთა სამინისტროს ინფორმაცით, დღეს, 2 დეკემბერს, ფოთში პოლიციელებზე თავდასხმის ბრალდებით დააკავეს ასლან ვაშაყმაძე, რომელიც 30 ნოემბერს სოციალურ ქსელში პოლიციელებზე ძალადობისკენ მოუწოდა მოქალაქეებს.
ფეისბუქში ძალადობისკენ მოწოდების შემდეგ შსს-მ გამოძიება დაიწყო ძალადობრივი ქმედებისკენ საჯაროდ მოწოდების მუხლით [239-ე მუხლის პრიმა ერთი].
„აღნიშნული გამოძიების ფარგლებში უწყების გადასაცემად და მოწმის სახით საგამოძიებო უწყებაში დასაბარებლად, მიმდინარე წლის 2 დეკემბერს, პოლიციის თანამშრომლები ქალაქ ფოთში შეხვდნენ ა.ვ.-ს, რა დროსაც ის თავს დაესხა სამართალდამცველებს და მიაყენა ფიზიკური დაზიანებები,“ – აღნიშნულია შსს-ს მიერ გავრცელებულ ინფორმაციაში.
ამჯერად ასლან ვაშაყმაძეს გამოძიება პოლიციელებზე თავდასხმასაც ედავება, რაც სასჯელის სახით 4-დან 7 წლამდე ვადით თავისუფლების აღკვეთას ითვალისწინებს.
ასლან ვაშაყმაძე „გამარჯვებული საქართველოს“ წევრია და ბათუმის საპროტესტო აქციებსაც ესწრებოდა. მან ფეისბუქში ვიდეო მიმართვა პოლიციელებზე ძალადობის მოწოდებით მას შემდეგ გაავრცელა, როცა „ბუშტების აქციაზე“ პოლიციელებმა მოქალაქე დააკავეს.
გაერთიანებული ოპოზიცია ასლან ვაშაყმაძის ძალადობისკენ მოწოდებას გაემიჯნა. მოგვიანებით სოციალურ ქსელში ვიდეომიმართვა ისევ გაავრცელა ასლან ვაშაყმაძემ, მან მოქალაქეებს ბოდიში მოუხადა აღელვებისთვის და თქვა, რომ ნებისმიერი სახის ძალადობას ემიჯნება.
