პანდემიის პირობებში, როცა რესტორნები შეზღუდვით მუშაობენ და წვეულების დარბაზებიც დაკეტილია, ბათუმში ხორცსა და თევზზე მოთხოვნა საგრძნობლად შემცირდა – ასე ამბობენ გამყიდველები, რომლებიც დიდი ხანია ამ პროდუქტით ვაჭრობენ.
ელზა ლაფერაშვილი, რომელიც ბათუმის თევზის ბაზრობაზე სხვადასხვა სახეობის თევზს წლებია ყიდის, გვეუბნება, რომ წელს მყიდველი პანდემიის გამო ძალიან ცოტაა.
ბათუმში თევზის ჩასაბარებელი ფასი ყველა სახეობის შემთხვევაში 1 ან 2 ლარითაა გაძვირებული.
რამდენიმე დღეა რაც თევზის ბაზრობაზე ქაფშიაც გამოჩნდა. თევზის ფასები ბაზრობაზე 23 ნოემბრის მონაცემებით ასეთია:
- ქაფშია – 5 ლარი;
- დორადო – 20, 22 ლარი;
- მერლანგი – 7-დან 10 ლარამდე;
- ბარაბული – 15, 20 ლარი;
- აუზის ზუთხი – 30, 35 ლარი;
- კამბალა – 40-დან 50 ლარამდე;
- ზღვის ორაგული – 22 ლარი;
- აუზის კალმახი – 12 ლარი;
- შავი ზღვის კეფალი – 10 ლარი;
- ქორჭილა – 25 ლარი;
- კეფალი – 10 ლარი.
თევზის ბაზარზე კილოგრამი თევზის იქვე გაწმენდა 2 ლარი ღირს, შეწვა – 6 ლარი.
მყიდველების შემცირებაზე ჩივიან ბონში მდებარე ბათუმის აგრარული ბაზრის ხორცის განყოფილებაშიც. აქ გვეუბნებიან, რომ ხორცპროდუქტების მყიდველი ცოტაა.
ამ დახლების ძირითადი მომხმარებლები რესტორნები და საქორწინო დარბაზები იყო პანდემიამდე. ყასბები ამბობენ, რომ ხორცი ბაზარში გაიაფდა, რადგან რეგიონებიდან ისევ იღებენ პროდუქციას, თუმცა მყიდველი აღარ არის.
23 ნოემბრის მონაცემებით, ღორის ხორცი ბათუმის აგრარულ ბაზარში 10, 12 ლარი ღირს. საქონლის ხორცის ფასი კი 12-დან 15 ლარამდე მერყეობს.
ხაშის მასალას 7 ლარად შეიძენთ.
ბათუმის აგრარულ ბაზარში კილოგრამი ქათმის ხორცის ფასი 6, 7 ლარია. ასეთი ფასი აქვს, მაგალითად, ხონისა და ქობულეთის ფერმების ქათამს. თხილნარის ფერმის ქათმის ფასი 6.50 ლარია. შესაძლებელია ცხიმიანი და უცხიმო ხორცის შერჩევა.
სოფლიდან ჩამოტანილ, ოჯახის ქათამს ბაზარში 18, 20, 22 ლარად შეიძენთ – ზომის მიხედვით.
