უმღლესი საარჩევნო კომისიის [უსკო] ინფორმაციით ბათუმის მაჟორიტარულ ოლქში [#28] წარდგენილი მაჟორიტარი კანდიდატებიდან მეორე ტურში გადავიდნენ ტიტე აროშიძე „ქართული ოცნებიდან“ და გიორგი კირთაძე „ერთიანი ნაციონალური მოძრაობიდან.“
ტიტე აროშიძე საარჩევნო კამპანიას აგრძელებს და პერიოდულად ამომრჩეველთან შეხვედრების შესახებ ფეისბუქზეც პოსტავს, გიორგი კითაძე კი აცხადებს, რომ მეორე ტურში მონაწილეობას პროტესტის ნიშნად არ მიიღებს და ის ბრძოლას არჩევნების შედეგების ბათილად გამოცხადების მოთხოვნით, აქციებზე, სხვა ოპოზიციურ პარტიებთან ერთად აგრძელებს.
ოპოზიცია მიიჩნევს, რომ არჩევნები გაყალბდა. მათივე მტკიცებით ამას ის შემაჯამებელი ოქმებიც აჩვენებს, რაც საუბნო კომისიებმა ოლქებში გადააგზავნეს, მათგან უმეტესობაში დისბალანსი ფიქსირდებოდა.
მეორე ტური ჩატარდება ასევე #30-ე [ხელვაჩაური, შუახევი, ქედა და ხულო] მაჟორიტარულ ოლქში სადაც „ერთიანი ნაციონალური მოძრაობიდან“ გია აბულაძე – წინა მოწვევის უმაღლესი საბჭოს წევრი და „ქართული ოცნებიდან“ ფრიდონ ფუტკარაზე – შუახევის ყოფილი მერი დაუპირისპირდებიან ერთმანეთს.
პირველი ტურის შედეგების მიხედვით #29 [ქობულეთი] მაჟორიტარულ ოლქში არჩევნები მოიგო ცოტნე ანანიძემ „ქართული ოცნებიდან“, ის წინა მოწვევის უმაღლეს საბჭოში ადამიანის უფლებების კომისიის თავმჯდომარე იყო.
